خط الرورو بين مصر وإيطاليا.. إيه فايدته واشمعنا دلوقتي بالتحديد

هو إيه خط الرورو اللي بتتكلم عليه وزارة النقل دلوقتي، وهل هيكون خط نقل ركاب ولا بضايع، وليه مصر هتتعاون فيه مع دولة إيطاليا، وإيه هي المكاسب الاقتصادية منه.. هنقولك كل التفاصيل في التقرير  ده فتابعنا للآخر.
 

في الساعات الأخيرة، الفريق كامل الوزير، نائب رئيس مجلس الوزراء للتنمية الصناعية، وزير الصناعة والنقل، أعلن عن إطلاق خط الرورو المصري/ الإيطالي بين مينائي (دمياط – تريستا)  قريب.

وخط الرورو ده هيكون مصري إيطالي، وهو مشروع اقتصادي مهم هدفه الربط البحري وإنشاء ممر أخضر بين جمهورية مصر العربية والجمهورية الإيطالية، وتدشينه بمثابة نتاج للعلاقات المتميزة على المستوى الإستراتيجي والاقتصادي بين البلدين.

وطبعا دلوقتي في توجيهات من الرئيس عبد الفتاح السيسي رئيس الجمهورية بتحويل مصر إلى مركز إقليمي للنقل واللوجستيات وتجارة الترانزيت، وكمان فتح أسواق تصديرية للصادرات المصرية من السلع الزراعية بالسوق الإيطالية والأوروبية، عشان كده خط الرورو هو ترجمة للتوجيهات دي.

ومقرر خلال الفترة الجاية، إن الحكومة المصرية تضاعف الصادرات المصرية وزيادة الموارد والعائدات الدولارية، عشان يخدم الاقتصاد الوطني، لأن من أهم أولوياتنا لتحقيق الأهداف دي، هو مشروع خط الرورو (دمياط – تريستا).

وطبعا المشروع ده هيبقي مشترك بين  الحكومة المصرية والقطاع الخاص المصري والإيطالي والعالمي، وكمان المصدريين المصريين  وكبري الشركات الإيطالية والعالمية المصدرة لمصر مستلزمات إنتاج، واللي عندها خطوط إنتاج في مصر.

ومن أهم مزايا أو مكاسب لمشروع الرورو، هي التعاون المينائي والتعاون الجمركي وتعزيز التعاون في النقل البري ونقل البضايع.

عشان كده، قامت الدولة المصرية بتقديم كافة الحوافز للمشروع لضمان الاستمرارية والتشغيل الاقتصادي، واللي بينها تخفيض رسوم الموانئ بنسبة 88٪؜ على أن يطبق مبدأ المعاملة بالمثل، وكمان تخفيض رسوم المرور على الطرق المصرية من 300 دولار أمريكى لكل شاحنة وارد، و350 دولار أمريكى لكل شاحنة صادر، عشان تكون 100 دولار سواء للصادر أو الوارد.

وكمان تم توقيع كافة الوثائق القانونية لتسيير الخط مع  الإيطاليين في أسرع وقت.

ونقدر نقول، إن الترويج للخط والبضائع المنقولة عليه بقى أولوية لنجاح المشروع، عشان كده وزارة النقل والحكومة المصرية بتقدم كب الدعم اللازم للخط عشان المشروع ينجح.

وقريب جدا وتحديدا يوم 23 نوفمبر 2024 الحالي، هيتم وصول باخرة لميناء دمياط لتفريغ شحنة تريلات وحاويات فارغة والانتظار في منطقة المخطاف بميناء دمياط، ويوم 29 نوفمبر 2024 هيكون الموعد الفعلي لبداية الخدمة في خط الرورو، وهتغادر السفينة من ميناء دمياط الساعة العاشرة صباحا ووصولها إلى ميناء تريستا يوم 2 ديسمبر 2024.

ومش بس كده، ده كمان هيتم تنفيذ احتفالية بمناسبة تدشين أول رحلة فعلية للخط يوم 29 من نوفمبر 2024 بميناء دمياط.

وفي النهاية، تدشين خط "الرورو" هدفه نقل الحاصلات الزراعية، وبيعتبر نوع من دعم منظومة النقل البحري السريع وهيقلل زمن وصول البضائع المصرية لأوروبا، خاصة وأن إجمالي قيمة ‏الصادرات الزراعية المصرية الطازجة والمصنعة حوالي 9,2 مليار دولار، وكمان هيشجع على زيادة الإستثمارات الإيطالية في مصر.