مصر تفتح كنوز الدهب.. مزايدة عالمية للتنقيب في 200 منطقة جديدة… هل يتحول الحلم إلى حقيقة؟
هل ممكن مصر في يوم من الايام تكون من أكبر منتجي الدهب في العالم؟ ويا ترى لو مصر طرحت مزايدة عالمية للتنقيب عن الدهب ده هيأثر إزاي على سوق الدهب ؟ وإحنا في مصر ممكن نستفيد إزاي من الاكتشافات الجديدة دي؟ وهل ممكن نشوف أسعار الدهب بتتغير؟ وإيه اللي ممكن يتغير في احتياطي مصر من المعدن النفيس؟
كل يوم بنسمع عن خطوات كبيرة لمصر في مجال التعدين وخصوصاً في الدهب لكن إيه اللي بيحصل فعلاً؟
بص يا سيدي .. مصر ناوية تطرح مزايدة عالمية للتنقيب عن الدهب في أكتر من 200 منطقة في الصحراء الشرقية وده قبل نهاية السنة فى خطوة كبيرة ليها أهميتها وتأثيرها على الاقتصاد وأسعار الدهب
الخطوة دي جاية في إطار جهود الحكومة المصرية لتعزيز الاستثمارات في قطاع التعدين والدهب تحديدا لأن الدهب مش مجرد معدن، ده ثروة استراتيجية. المسؤولين بيقولوا إن المناطق دي مليانة بالشواهد الاقتصادية الجذابة يعني عندها فرص قوية لاكتشاف الدهب وده اللي هيجذب شركات عالمية ضخمة عشان تستثمر في التنقيب داخل مصر
ومصر بتحاول تستثمر بشكل أكبر في القطاع ده وبتستهدف استثمارات بحوالي مليار دولار في التعدين بحلول 2030. .كمان مصر عايزو ترفع إنتاج الدهب لـ800 ألف أونصة سنويا خلال الـ6 سنين الجاية.. ودي طبعاً أرقام طموحة لكنها بتشير لحجم الفرص والاهتمام المتزايد بالمجال ده
طب تأثير الخطوة دي ايه على احتياطات مصر من الدهب؟
لو نجحت المزايدة دي وجذبت شركات كبيرة فعلا ده هيخلي مصر تزود من إنتاج الدهب بشكل كبير.. دلوقتي معظم الإنتاج جاي من منجم السكري، اللي هو أحد أهم وأكبر المناجم في الصحراء الشرقية ومن بعض المناجم التانية زي "حمش" و"إيقات".. لكن مع الاكتشافات الجديدة دي الاحتياطي المصري من الدهب ممكن يزيد ويأمن جزء مهم من احتياجات البلاد ويزيد من عائداتنا من المعدن النفيس.
والأهم كمان إن أي اكتشاف جديد للدهب معناه استثمارات جديدة وفرص عمل للعمالة المصرية خصوصاً في المناطق الصحراوية وده هيساعد في تنمية مناطق جديدة وتحقيق نمو اقتصادي
طب إزاي الخطوة دي ممكن تعزز من دور مصر في سوق الذهب العالمي؟
مصر عايزة ترفع مساهمة قطاع التعدين في الناتج القومي من 0.5% حالياً لـ5% خلال السنين الجاية وده طموح كبير لكن مش مستحيل.. مصر بتحاول تكون لاعب رئيسي في سوق التعدين على مستوى العالم ومش بس في الدهب لكن كمان في المعادن التانية.. كمان الهدف هو زيادة صادراتنا من 1.6 مليار دولار حالياً لـ10 مليارات دولار في 2040..و لو اتحقق ده مصر هتبقى من أكبر الدول المصدرة في مجال التعدين وده هيعزز من وضعنا الاقتصادي على المدى البعيد
طي هل فيه تحديات ممكم تواجه مزايدة التنقيب؟
زي أي حاجة كبيرة فيه تحديات بتقابلها .. شركات التعدين الكبيرة هتبقى مهتمة لكن هيبقى عندها اشتراطات بخصوص البنية التحتية وتوافر تكنولوجيا التنقيب وكمان لازم يبقى فيه شفافية ونظام قانوني واضح عشان الشركات تقدر تشتغل بثقة.. وعشان كده مصر شغالة على تطوير التشريعات عشان تناسب المعايير العالمية..و هيبقى فيه تصديق من مجلس النواب على عقود استغلال الدهب والمعادن اللي تم توقيعها بالفعل مع شركات عالمية زي "باريك للذهب" الكندية و"سنتامين" الأسترالية وده بيدي طمأنينة للمستثمرين إن عندهم أرضية قانونية صلبة
