بخطة مزدوجة.. شوف مصر بتعمل إيه في انجلترا

مصر حاليا شغالة بقوة جدا علي تشجيع السياحة الوافدة من الخارج والحكومة حاليا مركزة علي الدول اللي معروف عن السياح بتاعتها بارتفاع الانفاق، ووزير السياحة والآثار حاليا في زيارة مهمة للعاصمة البريطانية لندن.. ياتري الوزير بيعمل ايه هناك.. واية اللي عايزه مصر من انجلترا .. خليكم معانا للآخر وهتعرفوا التفاصيل

الحكومة حاليا بتسابق الزمن في حتة الترويج السياحي لمصر في الخارج، علشان تعمل تحفيز للسائحين اللي عايزين يخرجوا من قارة أوروبا واللي معروف عنها انخفاض شديد في درجات الحرارة في فصل الشتاء وبيكون خروجهم منها للدول اللي معروفة باعتدال درجات الحرارة وطبعا مفيش احسن من مصر وجو مصر واللي بيكون معتدل في فصل الصيف ومشمس في فصل الشتاء خصوصا في محافظات الاقصر واسوان واللي بيكون عليها اقبال سياحي كبير جدا من كل دول العالم في فصل الشتاء للاستمتاع بأجواء الشتاء وسط المعابد والمناطق الآثرية ومشاهدة عظمة الحضارة المصرية القديمة.

معروف ان الإقبال السياحي علي مصر في فصل الشتاء بيكون أعلي بكتير من فصل الصيف من القارة العجوز وفيه أعداد ضخمة من السائحين بيكونوا عايزين يخرجوا يقضوا فترات واحتفالات راس السنة الكريسماس في دول خارج بلادهم وكمان يهربوا من الثلج اللي موجود في بلادهم.

طيب اية اللي بيعمله وزير السياحة والأثار في لندن؟.
وزارة السياحة والأثار مشاركة بوفد كبير جدا في فعاليات الدورة الـ 43 للمعرض السياحي الدولي واللي هيعقد في الفترة من 5 إلى 7 نوفمبر الحالي بالعاصمة البريطانية لندن.

شريف فتحي وزير السياحة والآثار قال أن المشاركة في معرض لندن واللي بيعد واحد من أهم البورصات السياحية المهنية على مستوى العالم واللي بتحرص مصر على المشاركة فيه سنوياً، خصوصا أن السوق البريطاني واحد من أهم الأسواق السياحية الرئيسية المصدرة للسياحة إلى مصر.

وزير السياحة والآثار قال أن التواجد السياحي المصري في المحافل والمناسبات السياحية الدولية بيساهم في عقد لقاءات مع منظمي الرحلات وشركات الطيران المختلفة التسويقية والترويجية وكمان بنتعرف علي مقترحاتهم لزيادة الحركة السياحية الوافدة لمصر من الأسواق السياحية المستهدفة.

وعلشان نكون عارفين أن مصر مشاركة السنة دي في المعرض السياحي الدولي بلندن بجناح مساحته 800 متر مربع، بيضم 80 مشارك من بينهم 38 شركة سياحة و38 فندق، ده غير شركات الطيران، خصوصا أن معرض الـ WTM السياحي الدولي بيحظى بحضور كبر من منظمي الرحلات ووكلاء السياحة والسفر من مختلف دول العالم، وده بيجعل منصة رئيسية للقاء والتواصل بين متخذي القرار في مجال السياحة والسفر، وعدد كبير من المهنيين والمتخصصين حول العالم.

والمعرض السنة اللي فات شارك فيه 43 ألف مشارك من 184 دولة من مختلف دول العالم بزيادة وصلت لـ 23% مقارنة بعام 2022، وطبعا مصر مش هتلاقي فرصة أحسن من دي علشان تعرض المنتجات السياحية الموجودة عندها علي كل دول العالم خصوصا بعد الافتتاح التجريبي للمتحف المصري الكبير واللي هياخذ جزء كبير جدا من اهتمامات السائحين حوالين العالم، وده هيخلي مصر توصل لهدفها لتحقيق 30 مليون سائح في 2028.