تعمل إيه لو سحبت فلوس من ATM وطلعت لك فلوس مقطوعة
كتير منا وهو بيسحب فلوس من ماكينات السحب ATM بتطلع له فلوس مقطعة أو فلوس مقطوعة النمر وبيكون محتار مش عارف يودي الفلوس دي فين ولا يتخلص منها ازاي لو عايز تعرف حل للمشكلة دي وترجع الفلوس المقطعة وتاخذ بدلا فلوس سليمة اقرأ التقرير ده للآخر.
اكيد حصلت معاك في مرة وانت بتسحب فلوس من ماكينات السحب ATM أو سمعت واحد صاحبك أو حد عندك في البيت أنه وهو بيسحب فلوس طلعت له ورقة أو اتنين من الفلوس مقطوعة أو فلوس هلكانة ومش عارف تصرفها وفي الحالة دي المواطن بيكون مش عارف يتصرف ازاي ولا يصرف الفلوس دي باي طريقة خصوصا أن محدش بيرضي ياخذها منه وهو بيشتري حاجة وممكن تفضل معاك لحد ما تبوظ خالص.
من غير ما تلف ولا تحتار أنا دلوقتي هقولك علي طريقة تخلصك من الفلوس المقطوعة أو الفلوس اللي مش نافعة لو طلعت لك واحدة منهم من ماكينات السحب ATM وأول خطوة علشان تخلص من الفلوس المقطعة هيا أنك تروح للبنك اللي انت سحبت منه الفلوس أو اي فرع منه .
تاني حاجة علشان تتبدل الفلوس المقطوعة واللي خرجت لك من ماكينات السحب هيا أن يكون معاك ايصال السحب والفلوس اللي اخدتها من ماكينة السحب بشكل كامل وكمان تكون معاك رقم الماكينة اللي سحبت منها وتدخل البنك وتاحذ رقم وتستني دورك علي الشباك، ولما يجي عليك الدور موظف البنك هيطلب منك ايصال السحب ورقم الماكينة اللي سحبت منها ومعاد السحب، وبمجرد ما الموظف يتاكد أن صرفت فلوس من ماكينات السحب بتاعته هياخذ منك الفلوس المقطوعة أو لو فيها اي عيوب ويديك مكانها فلوس سليمة وجديدة بدون اي مشاكل، وده واحدة من الخطوات اللي كل البنوك بتحرص عليها علشان ترضي العملاء بتوعها وتحافظ عليهم، خصوصا أن البنوك كلها هدفها هو ارضاء العميل.
