أخطر اجتماع في 2024.. إيه اللى هيحصل بكره فى مجلس الوزراء؟

يا ترى ايه اللى هيحصل بكره فى مجلس الوزراء؟ وايه حكاية الاجتماع الثلاثي اللي بيعتبر الخطر فى 2024 ؟ وهل ممكن  أخيرا نسمع أخبار حلوة عن وضع مصر الاقتصادي وعن اللى هيحصل الفترة الجاية؟ ؟ وإيه اللي ممكن يعلنه رئيس الوزراء ومحافظ البنك المركزي بكره؟

خلال ساعات قليلة هتوصل كريستينا جورجيفا مديرة صندوق النقد الدولى الى القاهرة فى زيارة رسمية هتلتقي خلالها عدد من كبار المسئولين فى مصر وبعدها هتعقد مؤتمر صحفي مهم جدا هيكون محوره الأساسي مناقشة تطورات برنامج الإصلاح الاقتصادي لمصر بين الحكومة المصرية وصندوق النقد الدولي.

بكره الدكتور مصطفى مدبولي، رئيس مجلس الوزراء، وكريستالينا جورجييفا، مديرة صندوق النقد الدولي، وحسن عبد الله، محافظ البنك المركزي المصري، هيقفوا على منصة واحدة في مقر مجلس الوزراء في العاصمة الإدارية الجديدة.. ووجود الشخصيات دي سوا في مؤتمر واحد يعني إن في حاجة كبيرة بتحصل وأكيد المؤتمر ده مش مجرد لقاء عادي لكنه فرصة مهمة للإعلان عن مستجدات بخصوص ملف الإصلاح الاقتصادي لمصر واللي كان موضوع المراجعات والتأجيلات كتير الفترة اللي فاتت.

الكل منتظر.. هل هيعلنوا عن حاجة جديدة بخصوص المراجعة الرابعة لبرنامج الإصلاح اللي اتأجلت من أكتوبر لنوفمبر؟ وهل هيكون فيه توجه جديد للحكومة لدعم الاقتصاد؟ وهل فيه أمل لمساعدة جديدة من صندوق النقد لتخفيف الأعباء المالية على مصر؟.. اشئلة كتير مستنين نعرف اجاباتها بكره ان شاء الله

الأجواء حوالين المؤتمر متوترة شوية لأن زي ما قالت جورجييفا قبل كده مصر بتتحمل أعباء كبيرة بسبب الصراعات الإقليمية.. وكفاية تعرف ان البلد دلوقتي بتحمل حوالي 9 مليون لاجئ من الدول المجاورة اللي بتعاني من الحروب والأزمات زي السودان وفلسطين وده ضغط كبير جدًا على موارد الدولة.

جورجييفا كمان صرحت إن التوترات في الشرق الأوسط، خصوصًا في غزة أثرت بشكل كبير على الاقتصاد المصري و إيرادات قناة السويس اللي بتعتبر شريان مهم للدخل القومي لكنها خسرت حوالي 70% من إيراداتها بسبب الحرب وده رقم كبير ومش بس بيمثل تحدي اقتصادي لمصر لكنه كمان بيعكس قد إيه الوضع الإقليمي مضطرب وازاي ده بيأثر علينا بشكل مباشر.

بجانب ده كله المؤتمر جاي في وقت حاسم.. إحنا في نهاية سنة مليانة تحديات اقتصادية مش قليلة.. ومع توقعات بتثبيت أسعار الفايدة و تأثيرات الحروب والنزاعات حوالينا والتغيرات الكبيرة اللي بتشهدها المنطقة أكيد اللي هيخرج عن المؤتمر ده هيكون ليه أهمية خاصة.

هنتابع معاكم بكره تفاصيل أكتر من المؤتمر الصحفي وكل القرارات والتصريحات اللي ممكن تكون نقطة تحول في برنامج الإصلاح الاقتصادي لمصر وهل فيه أمل لإعلان جديد من صندوق النقد يخدم مصلحة الاقتصاد المصري ويخفف من الضغوط اللي بيعاني منها المصريين