انسوا التعويم الجنيه بخير.. ضربة حكومية موجعة لـ “خفافيش الدولار”
هو فعلا فيه تعويم جديد للجنيه قريب ؟ وهل الكلام عن خفض قيمة الجنيه قدام الدولار حقيقي ولا مجرد اشاعات؟ وليه رجع الكلام تانى عن تحريك سعر الصرف ؟ وهل فيه طلبات جديدة من صندوق النقد الدولي؟ .. تابعوا معانا الفيديو للآخر وهتعرفوا ايه اللى هيحصل الأيام الجاية
الأيام اللي فاتت انتشرت إشاعات كتير عن تعويم جديد للجنيه المصري وإن سعر الصرف هيتم تحريكه بشكل مفاجئ، لكن المستشار محمد الحمصاني المتحدث باسم مجلس الوزراء قال كلام مختلف تمامًا!.. الحمصاني طلع وأكد فى تصريحات تلفزيونية إن مفيش أي نية لتعويم جديد للجنيه خلال الفترة اللي جاية
طيب ليه الإشاعات دي بتطلع؟ وهل فعلاً البنك المركزي بيغير سعر الجنيه على هواه؟
في الحقيقة سياسة سعر الصرف في مصر بقت مرنة بمعنى إن سعر الجنيه بيتحرك بناءً على العرض والطلب مش بقرار مفاجئ من البنك المركزي.. يعني ببساطة الجنيه النهاردة خاضع لقوى السوق كل ما الطلب يزيد سعره يتأثر ولو العرض زاد ممكن ينزل.. واللي بيأكد الكلام ده، إننا شايفين إن سعر الصرف بيتحرك ببطء وبشكل طبيعي خلال الأسابيع والشهور اللي فاتت وده اللي بيدل على إن فيه شفافية أكبر في التعامل مع سعر العملة
ومش بس كده مسؤولين من صندوق النقد الدولي هيزوروا مصر الأسبوع الجاي عشان يراجعوا ملف الإصلاح الاقتصادي ويتابعوا التقدم اللي مصر حققته في الفترة اللي فاتت..و الزيارة دي جزء من المراجعة الدورية للبرنامج الاقتصادي والهدف منها إنهم يتأكدوا إن كل حاجة ماشية حسب الخطة الموضوعة و الحكومة كمان بتأكد إننا على الطريق لتحقيق معدلات تضخم أقل وده توجه إيجابي يهم كل مواطن
طب هل ده معناه إن مصر ممكن تقترض تاني من بره الفترة الجاية؟
الحكومة قالت بوضوح إن لو هنضطر نلجأ للاقتراض هيكون بس لسد الفجوة التمويلية يعني مفيش استدانة مفرطة أو بدون حساب..و القروض الخارجية مش هتكون لأي حاجة ومش هنستورد سلع ممكن نصنعها محلياً وده جزء من الاستراتيجية اللي بتحطها الدولة عشان ندعم المنتجات المحلية ونقلل الاعتماد على الاستيراد ونشجع التصنيع المحلي
في النهاية، الرسالة الواضحة إن مفيش تعويم جديد للجنيه زي ما الإشاعات بتقول والسياسة النقدية ماشية بشكل مرن بيدعم الاقتصاد وبيحافظ على استقرار السوق.. فالمرة الجاية لما تسمعوا إشاعة زي دي اتأكدوا من مصادرها وتابعوا الأخبار من مصدر موثوق عشان تعرفوا الحقيقة كاملة.. ويفضل إننا نركز على الحقايق ونبص دايمًا لصورة بشكل اكبر وما نرميش ودننا مع أى حد بيقول أى كلام لأن مصر ماشية بخطوات ثابتة عشان تلاقي التوازن بين السياسات الاقتصادية وتحقيق الاستقرار
