عشان تطمن على تحويشة العمر.. إزاي تأجر خزنة في بنك؟

ناس كتير بتدور على مكان آمن عشان تعين أو تحفظ فيه فلوسها ومقتنياتها الثمينة، زي الدهب والألماس أو تحويشة العمر، وتكون بعيد عن البيت أو أماكن العمل، عشان كده البنوك المصرية بتتيح للجميع خاصية تأجير خزنة في أي وقت.

طب إيه هي شروط تأجير الخزنة؟

بص يا سيدي، البنوك المصرية بتقدم للعملاء خزائن لحفظ الدهب أو الممتلكات الثمينة عشان تضمن انك حاجتك في مكان آمن ومن غير شروط، ومش بس كده ده متاح ميزة السرية والخصوصية التامة، بس ده بمقابل مصاريف سنوية قابلة للتجديد، باستثناء البنك الأهلى وبنك مصر، اللي بيتيحوا إمكانية الدفع شهريًا أو سنويًا.

ولو حضرتك محتاج تاخد خزنة، فبتختار البنك اللي يعجبك وتروح بنفسك تقدم طلب بصورة البطاقة وخلال ساعات هتاخد خزنة، بس بيكون لها مفتاحين، واحد في البنك والتاني مع حضرتك، ومن حقك  تروح في أي وقت للبنك تطمن على مقتنياته في الخزنة أو تسحب أو تعمل إيداع لحاجات تانية بدون تدخل من البنك، بس لازم يكون في أوقات عمل مش في اجازات رسمية.

يعني مثلا، عندك، البنك التجاري الدولي CIB، ممكن تأجر خزنة فيه بقيمة من 600 جنيه إلى 3 آلاف جنيه حسب نوع حساب العميل وحجم الخزينة.

أما بنك التعمير والإسكان، فالأسعار بتبدأ بين 500 جنيه إلى 1500 جنيه حسب حجم الخزينة هو كمان، وفي بنك أبو ظبي الأول فبتبدأ من 2000 جنيه للحجم الصغير، و3500 جنيه للمتوسطة، و4 آلاف جنيه للحجم المتوسط الأكبر، و5500 ألف جنيه للحجم الأكبر .

أما البنك العربي، فبيبدأ إيجار الخزنة من ألف جنيه للحجم الصغير، و2000 جنيه للمتوسط الصغير، و3 آلاف جنيه للمتوسط، و4 آلاف جنيه للأكبر.

وغيرهم من البنوك الحكومية والخاصة، فلو حضرتك عايز تطمن كويس على فلوسك وتحوشيتك، فقدامك كل البنوك المصرية اختار اللي تحبه وافتح خزنتك.