بـ50 ألف عربية في السنة.. إزاي الحكومة وطنت صناعة السيارات

مصر حاليا داخلة بتقلها في موضوع صناعة العربيات بكل أنواعها، بس المرة دي مختلفة لأنها هتصنع العربيات الكهرباء.. ياتري مصر بتعمل اية في مجال تصنيع العربيات.. وهل مصر قادرة علي تصنيع العربيات الكهربائية.

 
القيادة السياسية وجهت تعليمات مشددة للحكومة بتوطين كل اشكال الصناعة في مصر، وواحد من الصناعات اللي واخدة أهمية كبيرة من اجندة الحكومة في مجال الصناعة هيا توطين صناعة السيارات، وفعلا الحكومة في الفترة اللي فاتت وقعت أكتر من عقد مع كبري الشركات العالمية لبدء التصنيع المحلي للعربيات في مصر، وهتكون المصانع الجديدة للعربيات اغلبها  في المنطقة الاقتصادية لقناة السويس.
طيب ليه شركات تصنيع العربيات العالمية بدأت تنزل مصر في التوقيت ده بالذات؟.
مصر في الفترة الرئاسية الجديدة للرئيس عبدالفتاح السيسي عدلت عدد كبير من القوانين اللي كانت السبب الاساسي في تطفيش المستثمرين من البلد، ومع التعديلات التيسيرات الجديدة بدأت مصر تكون عنصر جذب كبيير للمستثمرين من كل دول العالم علشان ينزلوا مصر ويبنبو مصانع ومنشأت صناعية جديدة ويستفادوا من التحفيزات اللي طرحتها الحكومة لتشجيع الاستثمار.
في الفترة اللي فاتت مصر استقبلت اكتر من طلب لكبري شركات تصنيع العربيات للدخول لمصر وهتبدا تصنيع العربيات بشكل محلي عندنا، وطبعا مصر رحبت جدا بالشركات خصوصا ان مصر في الوقت الحالي بتستهدف دخول كل الصناعات المختلفة لبدء التصنيع المحلي للمنتجات، وصناعة العربيات واحدة من اهم الصناعات اللي الحكومة مستهدفة توطينها في الوقت الحالي بسبب الفاتورة الدولارية الكبيرة اللي بتدفعها مصر لاستيراد العربيات وقطع غيارها.
طيب اية اللي بتعمله مصر في موضوع تصنيع العربيات الكهربائية؟.
مصر حاليا دخلت مرحلة جديدة من تصنيع العربيات، والفريق كامل الوزير وزير النقل والصناعة وقع اتفاق مع شركة بايك الصينية وشركة ألكان أوتو، ودول اثنين من كبري شركات المجموعة المصرية العالمية للسيارات علشان يعملوا مصنع لإنتاج سيارات الكهربائية في مصر.
مصنع العربيات الكهربائية الجديد هيبدأ إنتاجه نهاية عام 2025، وهيقام على مساحة 120 ألف متر، وبيهدف لتلبية احتياجات السوق المحلي وكمان هيكون في تصدير لأسواق الشرق الأوسط وإفريقيا، وهيوصل انتاج المصنع في السنة الأولي لـ 20 ألف عربية، وهيوصل حجم الإنتاج بنهاية السنة الخامسة لـ 50 ألف عربية وهتوصل نسبة المكون المحلي للمشروع لـ48% ومستهدف زيادتها لـ 58%، وهيوفر المشروع 1200 فرصة عمل جديدة للشباب .