مصر تُغير لهجتها وصندوق النقد يتحرك .. إيه اللي بيحصل في الكواليس

يا ترى إيه اللي بيحصل في الكواليس بين مصر وصندوق النقد الدولي؟ وليه مصر غيرت لهجتها في كلامها عن برنامج الإصلاح الاقتصادي؟ وهل الصندوق ممكن يستجيشب لمطالب مصر بتخفيف العبء على المواطن؟ وهل زيارة كريستالينا جورجيفا، مديرة صندوق النقد الدولي، هتكون بداية لتحولات جديدة في مسار الاقتصاد المصري؟

بعد شهور من التطبيق الصارم للإصلاحات الاقتصادية.. مصر النهارده مؤخرا غيرت لهجتها فى الحديث عن برنامج الاصلاح الاقتصادي مع صندوق النقد الدولي..  الدكتور مصطفى مدبولي رئيس الحكومة اللي كان دايمًا بيدافع عن برنامج الإصلاح وتحدياته، بدأ يتكلم عن أعباء جديدة مش على الدولة المرة دي لكن على المواطن.. ودي أول مرة نسمع فيها توجه واضح من الحكومة بتوجيهات من الرئيس السيسي بضرورة مراجعة بنود البرنامج مع الصندوق

في المؤتمر الصحفي الأخير لرئيس لاحكومة  مدبولي لمح إن المناقشات مش بس هتدور حول الجدول الزمني للإصلاحات لكن كمان حوالين الأهداف نفسها وده بيعني إن الحكومة بتسعى لتخفيف الأعباء الاجتماعية والاقتصادية على الناس فهل ده هيكون خطوة في اتجاه تخفيف الضغط على المواطن المصري؟

كريستينا جورجيفا استجابت واتفاعلت سريعًا مع تصريحات رئيس الحكومة وأعلنت إنها هتسافر مصر خلال 10 أيام لمتابعة الوضع بنفسها والتأكيد على أهمية التمسك بالإصلاحات المطلوبة.. جورجيفا اتكلمت عن تأثيرات الأزمات في المنطقة زي الصراعات في غزة ولبنان والسودان وتأثيرهم على الاقتصاد المصري خصوصًا مع تراجع إيرادات قناة السويس اللي بتمثل شريان اقتصادي مهم لمصر.

في نفس الوقت توقعات النمو في مصر بترتفع مع توقعات وكالة رويترز الأخيرة اللي قالت إن النمو الاقتصادي ممكن يوصل لـ4% خلال العام المالي لحد يونيو 2025 وإنه هيكمل الصعود لـ5.3% بحلول 2027… و الأرقام دي بتأمل الحكومة إنها تكون نتيجة إيجابية للإصلاحات لكن هل الصندوق هيراعي الأعباء على المواطن في ظل الظروف الاقتصادية الصعبة؟

بجانب ده مصر كانت عملت اتفاقيات كبيرة زي صفقة منطقة رأس الحكمة اللي باعت فيها حقوق التطوير للإمارات بمبلغ 35 مليار دولار واللي مهّدت الطريق لاتفاقية التمويل الأخيرة بقيمة 8 مليار دولار مع صندوق النقد.

الأسئلة اللي في الكواليس كتير.. والكل عاوز يعرف هل صندوق النقد هيتجاوب مع المطالب المصرية؟ وإيه تفاصيل زيارة كريستينا المنتظرة لمصر؟ هنشوف في الأيام الجاية خطة الحكومة بوضوح وهل هيكون في تغييرات حقيقية بتخفف الأعباء على الناس ولا البرنامج هيستمر زي ما هو ؟