أزمة شركات شحن السيارات الكهربائية.. إيه اللي بيحصل في السوق

إيه اللي بيحصل في سوق السيارات الكهربائية في مصر وايه حكاية أزمة شركات شحن السيارات دي وليه وزارة الكهرباء رافضة تجدد تراخيص عدد منها وايه مصير سوق السيارات الكهربائية بعد القرار.. خليكم معانا للآخر وهتعرفوا التفاصيل.
 
في الأيام الأخيرة فيه أزمة حادة بين وزارة الكهرباء وبين شركات شحن السيارات الكهربائية ودا بعد قرار لجنة إصدار شهادات تجديد تصاريح الطاقة الكهربائية التابعة لجهاز تنظيم مرفق الكهرباء وحماية المستهلك المصري،  عدم تجديد تراخيص عدد من الشركات في مجال شحن السيارات الكهربائية بسبب المخالفات.

و زارة الكهرباء قالت إن اللجنة المشكلة من جهاز تنظيم مرفق الكهرباء وحماية المستهلك لمنح التراخيص قررت عدم الموافقة على تجديد التصريح الصادر لشركات معينة بإنشاء محطات شحن سيارات كهربائية لمدة عام تالت وإن سبب عدم الموافقة على تجديد الترخيص، هو اكتشاف اللجنة المشكلة من جهاز مرفق الكهرباء عدم جدية الشركات دي في تنفيذ أي من نقاط الشحن المقترحة حتى نهاية شهر سبتمبر اللي فات وعشان كده اللجنة قررت كمان عدم الموافقة على تجديد السريان السنوي لترخيص بيع الكهرباء من محطات شحن سيارات كهربائية.

كمان اللجنة قالت إن الشركات دي خالفت بنود الكتاب الدوري رقم 5 لسنة 2022 الخاصة بقواعد تنظيم العمل في مجال شحن السيارات الكهربائية، وقرار عدم تجديد سريان الترخيص حتى يتم إزالة تلك المخالفات والالتزام بوجود (50 محطة أو 150 نقطة شحن في العام) وإلا هيتم إلغاء الترخيص الصادر

مش كده وبس دا كمان الشركات العاملة في مجال شحن السيارات الكهربائية تقدمت بطلبات لوزارة الكهرباء من أكتر من 3 سهور لزيادة تعريفة شحن السيارات الكهربائية بسبب ارتفاع التكاليف الاستثمارية لإنشاء  المحطات وانخفاض الجنيه مقابل الدولار، وتم إبلاغهم بالنظر في مطالبهم.
وحسب المصادر الشركات طلبت زيادة التعريفة بأكتر من 42% في أقرب وقت بعد خفض قيمة الجنيه المصري مقابل الدولار في مارس اللي فات، لأنهم شايفين ان التعريفة كانت منخفضة عند إقراراها لتشجيع المستخدمين على شراء السيارات الكهربائية. وحددت التعريفة في فبراير 2022 على سعر دولار بنحو 15.6 جنيه بينما يتجاوز سعر الدولار حالياً 48.4 جنيه.

طيب تأثير القرارات الأخيرة ومطالب رفع تعريفة الشحن على سوق السيارات الكهربائية هيكون ايه؟
زي ما احنا عارفين إن سوق السيارات الكهربائية لسه جديد في مصر والناس لسه متخوفة منه عشان مشاكل كتير زي قلة محطات الشحن على الطرق السريعة والإقليمية ودا غير المشاكل الفنية اللي بدأت تظهر في السيارات دي على مستوى السوق العالمي ومنها عيوب فنية خطيرة وكل شوية نسمع عن سحب آلاف السيارات من النوع دا بسبب عيوب خطيرة واكيد القرارات الأخيرة هيكون ليها تأثير سلبي على حركة البيع لأن رفع تكلفة الشحن هيكون سلبي جدا لأن الناس بتشتري سيارات كهربائية عشان تهرب من سعر البنزين المرتفع ورفع سعر شحن السيارات الكهربائية هيفقدها أهم ميزة فيها.