بـ 30 مليون بيض.. شوف الحكومة هتحل أزمة ارتفاع أسعار البيض في الاسواق ازاي

 
الفترة الحالية مصر بتعاني من ارتفاع اسعار بيض المائدة، وده اثر علي اسعار الكتكوت الابيض في الاسواق وسعره وصل لأرقام قياسية لاول مرة يوصل لها، ياتري الحكومة هتحل المشكلة دي ازاي.. وايه أسباب ارتفاع اسعار البيض في الاسواق.

في الوقت اللي الحكومة بتحاول تحل المشاكل اللي بتواجه توفير السلع وخفض اسعارها، ظهرت ازمة كبيرة في توفير بيض المائدة في مناطق الاستهلاك، والانخفاض ده تسبب في ارتفاع اسعار البيض ووصل سعر الطبق حاليا لاكتر من 180 جنية، وده رقم كبير وصعب علي الاسر المصرية خصوصا أننا في وقت عام دراسي جديد وبيكون فيه اقبال كبير من الاسر علي شراء البيض لتجهيز الوجبات المدرسية للطلاب.
انعكاسات ارتفاع اسعار البيض ظهرت بشكل قوي علي اسعار الفراخ في الاسواق واللي ارتفعت هيا كمان بسبب نقص البيض اللي بيدخل لانتاج الكتكوت الابيض، ووصل سعر الكتكوت في بعض المناطق لـ56 جنية، والزيادة دي غير مبررة من الوقت الحالي خصوصا أن مصر حاليا عندها استقرار في اسعار صرف العملات الأجنبية وكمان عنها توفير كبير في الاعلاف بالاسواق، يعني مفيش ازمة في توفير اكل الفراخ زي ما كان بيحصل قبل كده .
مش كده بس لا ده مصر بقي عندنا استمرار في التغذية الكهربائية خصوصا ان المربيين في فترة من الفترات، وقالوا ان اسباب ارتفاع اسعار الفراخ في الاسواق بسبب نفوق اعداد كبير من فراخ التربية هو قطع الكهرباء واللي كان تزامن مع وقت ارتفاع درجات الحرارة والمربيين اشتكوا في الفترة دي من عدم توفير التجهيزات الكافية لمزراع التربية سواء مولدات أو مبردات علشان يقدروا يعملوا الدورة الكاملة في تربية الفراخ.
طيب ازاي الحكومة هتحل ازمة توفير بيض المائدة في الاسواق وانعكاسات الحل ده اية؟.
شريف فاروق، وزير التموين والتجارة الداخلية وجه الشركة القابضة للصناعات الغذائية لتوفير وزيادة معدلات ضخ وطرح كميات كبيرة من بيض المائدة بالمجمعات الاستهلاكية على مستوى الجمهورية علشان تناسب احتياجات المواطنين وكمان تزود احتياجات الكميات المعروضة بالسوق المحلي.
وزير التموين والتجارة الداخلية أعلن ولاول مرة عن قيام الشركة القابضة للصناعات الغذائية من خلال الشركات التابعة لها بالتعاقد على استيراد كميات كبيرة من بيض المائدة هتوصل لمليون طبق بيض بأجمالي 30 مليون بيضة مائدة عالية الجودة، وفعلا الشركة القابضة للصناعات الغذائية بدأت تجيب شحانات البيض من الخارج ووصلت منهم أول شحنة لمطار القاهرة الدولي وباقي الشحنات هتوصل علي مراحل خلال شهري أكتوبر الحالي ونوفمبر اللي جاي علشان تغطي النقص اللي موجود في السوق المحلي.
التعاقدات الجديدة اللي قامت بيها الحكومة في الفترة اللي فات هتدخل منه نسبة كبيرة لانتاج الكتكونت الابيض علشان الحكومة تحل ازمة ارتفاع اسعاره في الاسواق، خصوصا أن ازمة ارتفاع سعر الكتكوت بدأ تنعكس علي ارتفاع سعر الفراخ واللي بقت أزمة جديدة في السوق.