قرار هيعمل قلبان في سوق العربيات.. يا ترى إيه اللي بيحصل في الكواليس؟

يا ترى ايه القرار الجديد اللي الحكومة بتفكر فيه استيراد العربيات ؟ وليه متوقع القرار ده يعمل قلبان فى سعر العربيات الجديدة والمستعملة؟ وهل فعلا أسعار العربيات هتروح فيحتة صعبة وممكن تغلى أكتر ولا ممكن يحصل العكس؟ وهل قرار الحكومة بتخفيض كوتا استيراد العربيات هيحل أزمة نقص السيارات في السوق ولا هيزودها تعقيد؟

الحكومة بتفكر في قرار جديد ممكن يكون ليه تأثير كبير على سوق العربيات في مصر.. القرار هو تخفيض كوتة استيراد العربيات بنسبة 20%، يعني الشركات مش هيكون مسموح ليها تستورد أكتر من 8 آلاف عربية في الشهر بدل 10 آلاف عربية اللي كانوا مسموحين بيهم في الكوتة اللي حددتها الحكومة في شهر يونيو اللي فات.. طبعا الخطوة دي جاية في وقت مصر بتحاول ترشيد استخدام الدولار بسبب أزمته اللي مش بتنتهي

فيا ترى القرار ده هيأثر على أسعار العربيات إزاي؟ وهل نقص العرض في السوق هيزود الأسعار ولا ممكن العكس؟"

القرار ده معناه إن عدد العربيات اللي هتدخل مصر من بره في السنة مش هيزيد عن 96 ألف عربية .. وده طبعاً رقم قليل جداً مقارنة بسنين قبل أزمة الدولار، زي 2021 و2022 لما استوردنا 184 ألف و290 ألف عربية على التوالي

المسؤولين الحكوميين اللي اتكلموا عن القرار قالوا إن الهدف الرئيسي منه هو تقليل الضغط على احتياطي العملة الأجنبية اللي بقى في وضع حساس جداً دلوقتي.. و الحكومة بتحاول بقدر الإمكان تقلل الاستيراد علشان توفر الدولار وتوجهه لأولويات تانية زي السلع الأساسية والدويةوغيرهم من الحاجات الضرورية اللي الناس متقدرشتستغني عنها

الناس اللي شغالين في مجال العربيات زي علاء السبع عضو الشعبة العامة للسيارات شايفين إن القرار ده حتى لواتطبق مش هيحل الأزمة اللي بيمر بيها السوق.. بالعكس بيقولو ممكن القرار ده يتسبب في خسائر أكتر للتجار والمستوردين اللي السوق عندهم واقف أصلاً

طب بعيد عن الحكومة والتجار ايه اللى ممكن يحصل لللعربيات بعدتطبيق القرار الجديد؟

نقص العرض مع الطلب اللي موجود في السوق غالباً هيؤدي لزيادة الأسعار.. وده اللي بيخوف المستهلكين والمستوردين.. العربية اللي بتدخل السوق أصلاً دلوقتي سعرها عالي ومع تقليل الكوته ممكن نشوف الأسعار بتعلى أكتر بسبب نقص العرض.. لكن في نفس الوقت فيه نقطة تانية ممكن تقلل من التأثير السلبي وهي إن الطلب على العربيات الجديدة في مصر فعلاً قل بسبب الأسعار المرتفعة جداً وبالتالي الركود الحالي في السوق ممكن يخفف من تأثير القرار ده على الأسعار.

ووفقا للقرار المحتمل تطبيقه قريب  إن الشركات المستوردة هتكون مطالبة بتوفير 60% من قيمة العربيات اللي هتستوردها من بره بالدولار.. وده طبعاً هيفرض ضغوط زيادة على السوق... وفي نفس الوقت، الرئيس السيسي أكد إن الحل الوحيد للأزمة دي هو إننا نصنّع عربياتنا بنفسنا لكن طبعاً ده مش هيكون سهل ومش هيحصل بين يوم وليلة.

من ناحية تانية، الحكومة كمان عدلت على اللائحة التنفيذية لقانون الأشخاص ذوي الإعاقة بخصوص عربيات ذوي الهمم، واللي هتكون ليها شروط جديدة زي إن سعة الموتور ما تعديش 1200 سي سي، وما يكونش فيها تربو.. ده طبعاً في إطار ترشيد الاستيراد وتقليل الإنفاق الدولاري.

الأكيد ان  القرار ده محاولة من الحكومة لموازنة استخدام الدولار والحد من الاستيراد لكنه ممكن يتسبب في مزيد من الارتفاع في أسعار العربيات الفترة الجاية.. والسؤال اللي لازم نسأله: "هل هنشوف انفراجة في الأزمة قريب؟ وهل فعلاً تصنيع العربيات في مصر هو الحل النهائي؟