أول خطوة في إسقاط الدولار.. بديل سويفت ضربة البداية

إيه اللي بيتخطط للدولار دلوقتي وهل ممكن يجي الوقت والوحش الامريكي يسقط ويبقي زي أي عملة عادية.. وإيه حكاية بديل سويفت وإزاي بوتين ناوي ينهي سطوة العملة الامريكية عالميا وهل هيقدر مع مجموعة البريكس وإيه اللي هتستفاده مصر من كل دا.. لو عاوز تعرف تابعنا للنهاية وانت تعرف التفاصيل

زي ما احنا عارفين إن قوة الدولار جاية من أكتر من سبب أولها أنها عملة الاقتصاد الأقوى والأعظم عالميا وهو الاقتصاد الامريكي وتاني حاجة إنها عملة الاحتياطي الرئسيسة في العالم وإنها كمان عملة التداول العالمية في المعاملات التجارية وبيها بتتسعر أسواق الطاقة والدهب والمعادن وصادرات وواردات الدول كمان هو العملة الرئيسية في مؤسسات التمويل والاقراض الدولية.

وفيه سبب تاني لقوة الدولار وهي إنه عمود نظام الدفع العالمي وتدفق السيولة بين الدول والبنوك المركزية والدولية سويفت وكل دا خلق هيبة وسطوة الدولار.

طيب إيه الجديد وليه بنتكلم على قوة الدولار نهاردة؟
لأسباب كتير أولها إن فيه زي تمرد على الدولار من دول كتير بتمثل بردو قوة اقتصادية ضخمة زي الدول الاعضاء في تكتل بريكس واللي بتضم الصين والهند وروسيا ووجنوب افريقيا والارجنتين ومصر ودول تانية قوية اقتصاديا والحقيقة فيه اسباب قوية تخلي دول بريكس وخاصة روسيا والصين واللي متحمسين جدا لمواجهة الدولار واختراع بديل عنه ودا لأن العملة الامريكية كانت اداة قوية من أدوات العقوبات المالية الأمريكية على الدولتين دول تحديدا واللي خسروا بسببها مليارات الدولارات ودا غير النكاية السياسية.

الجديد بقي إن الرئيس الروسي، فلاديمير بوتين، أكد في الساعات الاخيرة إن دول مجموعة بريكس شغالة دلوقتي  على تنظيم تبادل المعلومات المالية بين البنوك المركزية، واللي هتكون بديل  لنظام سويفت..  وقال بوتين إن النظام الجديد اللي هتعمله بريكس هيكون لتبادل المعلومات المالية بين البنوك المركزية وهيكون بديل لنظام سويفت، وضمان المدفوعات المالية بين الدول الاعضاء.

بوتين كشف كمان إن حاليا بيتم دراسة إمكانيات التوسع في استخدام العملات الوطنية في التبادل التجاري والدفع المالي بين الدول الاعضاء بديلا عن العملة الامريكية وتحسين العلاقات بين البنوك المركزية وضمان التبادل الموثوق للمعلومات المالية، واللي هتكون مستقلة عن أدوات تبادل المعلومات الدولية، يعني النظام الجديد هيكزم حاص بالدول الاعضاء في بريكس ومش هترتبط بسويفت ولا غيره عشان تضمن مايكونش سيف على رقبتها.

طيب إيه هو نظام سويفت اللي بريكس هتعمل بديل عنه وإاللي أمريكا جمدت اشتراك روسيا فيه؟

شوف ياسيدي دا عبارة عن شريان مالي عالمي بيسمح بانتقال سلس وسريع للمال عبر الحدود والدول و كلمة سويفت - SWIFT - هي اختصار لجملة "جمعية الاتصالات المالية العالمية بين البنوك"، وتم إنشاء النظام سنة 1973 ومركز الجمعية بلجيكا، وبيربط نظام سويفت 11 ألف بنك ومؤسسة في أكتر من 200 دولة.
ونظام سويفت بيرسل أكتر من 40 مليون رسالة يومية، ومن خلاله بيتم تداول تريليونات الدولارات بين الشركات والحكومات.
مصر طبعا هتستفاد بأي ضعف للدولار ولو النظام الجديد اللي ناوية عليه بريكس هيتم أكيد هيأثر على الدولار لأنه هيتم فيه التحويلات المالية بالعملات الوطنية لدول بريكس بعيد عن الدولار الأمريكي واللي اكيد هيتوفر أكتر والطلب عليه هيقل في مصر لو النظام اللي قال عليه بوتين اتحقق.