مفيش تخفيف أحمال تاني.. شوف إزاي الحكومة هتأمن تشغيل الكهرباء في الصيف اللي جاي
مصر في فصل الصيف اللي فات استوردت كميات كبيرة جدا من الغاز الطبيعي والمازوت لتشغيل محطات توليد الكهرباء وحل أزمة انقطاع الكهرباء.. يا تري مصر هتستعد لفصل الصيف اللي جاي ازاي.. هل الحكومة هترجع تقطع الكهرباء مرة تانية .
علي مدار سنة كاملة الشعب المصري عاني بشكل كبير قوي بسبب مشكلة قطع الكهرباء واللي كانت ممكن تقطع في أي وقت من اليوم سواء النهار أو الليل، وطبعا لما الكهرباء كانت بتقطع كانت الحياة شبه بتقف تماما خصوصا أن كل حاجة دلوقتي في حياتنا مرتبطة بالكهرباء.
وزي ما الحكومة أعلنت أن أزمة قطع الكهرباء كان سببها نقص إمدادات الوقود اللي بتحتاجها محطات توليد الكهرباء وان الحل هو توفير المواد البترولية دي، علشان المحطات ترجع تشتغل بشكل طبيعي والأمور ترجع لطبيعتها وده اللي حصل وفعلا الحكومة كلفت وزارة البترول والثروة المعدنية بالتعاقد علي استيراد الكميات اللي هتكفي محطات توليد الكهرباء، والبداية كانت لمدة شهرين في فصل الصيف اللي فات، وحاليا الدولة أعلنت عن توديع تخفيف الاحمال وقطع الكهرباء للابد .
طيب ازاي الحكومة هتأمن استمرار الكهرباء في الفترة والصيف اللي جاي خصوصا أن مصر كل يوم بتتوسع في منطقة جديدة والمناطق دي طبعا بتحتاج كهرباء ؟.
الحكومة حاليا شغالة في أكتر من اتجاه لتأمين استمرار انتاج الكهرباء واحد من الاتجاهات دي هو مواجهة سرقة التيار وتركيب عدادات كودية للمخالفين وتوقيع عقوبات عليهم علشان يركبوا عدادات رسمية تحسب كمية الطاقة اللي بيستهلكوها بالضبط، خصوصا أن نسبة سرقة التيار بتوصل حاليا لأكثر من ربع الطاقة اللي المحطات بتولدها، وللاسف الكمية دي كلها مفيش حد بيدفع حسابها ولا بيكون لها مقابل مادي .
تاني اتجاه الدولة شغالة عليه حاليا هو زيادة إنتاج المواد البترولية من خلال تنمية وحفر آبار جديدة للبترول علشان تغطي الطلب المحلي وكمان نوقف استيراد المواد البترولية من الخارج، وبالتالي هنوفر ارقام كبيرة من الفاتورة الاستيرادية لمصر من المواد البترولية .
تالت اتجاه الدولة شغالة عليه حاليا هو مشروع الربط الكهربائي مع السعودية وده اللي هيتح للدولة استيراد كهرباء من السعودية عن طريق الخط ده، وبداية تشغيل خط الربط الكهربائي المصري السعودي هتكون مع بداية فصل الصيف اللي جاي وتحديدا في شهر مايو 2025 وهتكون بداية تشغيل المشروع بقدرة 1500 ميجاوات والمرحلة الثانية واللي هتكون معاها التشغيل الكامل للمشروع في شهر أكتوبر 2025، وهتوصل القدرة التشغيلية للخط ل 3000 ميجاوات وات .
