عاوزين مكسب سريع.. كلمة قالها الرئيس ومحدش خد باله منها

 
 
شفنا امبارح تصريحات الرئيس السيسي في افتتاح محطة قطار بشتيل ومشروعات نقل عملاقة في مصر والرئيس قال كلام مهم جدا في الشأن الاقتصادي.. ايه أخطر حاجة قال عليها الرئيس السيسي امبارح ومحدش خد باله منها.. خليكم معانا للآخر وهتعرفوا التفاصيل كلها في الفيديو ده 
 

الرئيس السيسي امبارح لما طلب من الفريق كامل الوزير وزير الصناعة والنقل إنه يعيد عرض جداول بتوضح حجم واردات المصريين في آخر سنة والارقام كانت كبيرة ومستفزة واتكلم الرئيس السيسي ووجه كلامه المصنعين وبتوع الصناعة والاستثمار وقالهم كده مايصحش لكن الجملة اللي قالها بعد كده السيسي وهي اللي كشفت سبب ازمتنا والهوس بالاستيراد لما قال رجال الأعمال والصناعة أو المستوردين بدل ما ياخد أرض ويبنوا مصنع وتراخيص ويشتري خطوط انتاج ويوظف عمالة بيروح يستورد من بره احسن عشان المكسب السريع.

الحقيقة الرئيس السيسي حد ايده على مشكلة خطيرة جدا في مصر وهي عقدة الخواجة اللي دمرت الصناعة المصرية زمان والتشكيك في جودتها لصالح المنتج الأجنبي ودلوقتي رجال الأعمال بيستسهلوا ويستوردوا من بره بدل ما يعمل صناعة وطنية حقيقية ودا موضوع غاية في الخطورة لأن مهما كانت جهود الدولة ولو جبنا 100 كامل الوزير من غير رجال الصناعة والاعمال مش هيكون عندنا صناعة ولا عمرنا هنصدر بالارقام اللي احنا عاوزينها لأن الحكاية مش حكاية شطارة وتجارة ومكسب سهل وسريع لكن دا شيئ ليه علاقة بالأمن القومي المصري والاستراتيجي لما تصنع أكلك محدش هيقدر يضغط عليك كمان هوس الاستيراد بيستنزف الدولار وفي نفس الوقت بيخلي الدولة تحت ضرس الأسواق الخارجية وشفنا اللي حصل بعد الأزمة الروسية الأوكرانية وقبلها في أزمة كورونا وازاي اعتمادنا على الأسواق العالمية خلانا مش عارفين نعمل ايه ولا نسيطر على الأسواق والاسعار والغلاء.

رسالة الرئيس السيسي كانت واضحة جدا أن اللي بيحصل دا ميقومش دولة بحجم مصر ولا يبني اقتصاد قوي وإن الصناعة هي مستقبل البلد دي والتصدير هو اللي هينقذها وتخيل لما مصر تبدأ عصر الصناعة مع دول زي الهند وكوريا الجنوبية يوغسلافيا ونشوف هنا وصلوا فين واحنا لسه فين ودا بسبب إن الناس في الهند وكوريا الجنوبية فضلو الصناعة الوطنية بتاعتهم عن صناعة الخواجة اللي جاية من بره والناس قبلت بالمنتج الوطني لغاية ما بقي ينافس عالميا وبقي هو الافضل وغير كده مصر مش هيكون عندها صناعة قوية وتشيل بلد فيه 110 مليون بني آدم.

طيب ايه اللي جاي ؟
اكيد بعد كلام الرئيس السيسي امبارح كل المسؤولين ومعاهم رجال الأعمال هيكون ليهم وقفة مع النفس وأكيد هيكون فيه فكر مختلف للنظر الي الصناعة باعتبارها المنقذ دلوقتي من كل الأزمات اللي بتواجهنا ولسه هتواجهنا بسب الاعتماد الكبير على الاستيراد وبمبالغ ضخمة بتستنزف العملة اللي الدولة بدبرها بصعوبة أصلا وشفنا اي زيادة في أسعار الدولار المواطن العادي والغلبان هو اللي بيدفع التمن وبيتحمل فرق السعر من ارتفاع أسعار السلع بشكل كبير.. باختصار نجيبها كده وتوديها كده مش هنقوم وننهص صح غير بصناعة قوية وبجودة عالمية وإصرار على المنافسة والنجاح والتخلي عن عقلية المكسب السريع.