مهمة دفن الدولار.. حسن عبد الله بيعمل إيه في روسيا
المصرفي المخضرم حسن عبد الله محافظ البنك المركزي المصري زار روسيا في مهمة خاصة.. إيه هي المهمة دي وايه علاقتها بالدولار وبريكس بتفكر في ايه.. خليكم معانا للآخر وهتعرفوا التفاصيل في الفيديو ده.
زي ما احنا عارفين إن مصر انضمت بشكل رسمي إلى تحالف بريكس ودا تحالف بيضم دول فيها تقريبا نص سكان الكوكب وأضخم الأسواق والموارد الطبيعية والصناعية والزراعية والتكنولوجية وفيه الصين والهند والبرازيل وجنوب أفريقيا ومصر والسعودية والإمارات وكلها دول بتتحكم في إنتاج الطاقة وخطوط التجارة العالمية ولو التحالف دا نجح في تطوير نفسه وزيادة التعاون والتكامل بين الدول الأعضاء يبقي هيتحكم في اقتصاد العالم خلال سنين قليلة.
طيب مصر هتستفاد إيه من الانضمام لبريكس ؟
دا سؤال مهم جدا والإجابة عليه فيها تفاصيل كتير جدا ومصر تقريبا أكتر دولة هتستفاد من الانضمام للبريكس عشان توسع أسواقها الخارجية لنفاذ منتجاتها وتقدر تجذب الاستثمارات من دول المجموعة وكمان زيادة التبادل التجاري مع دول المجموعة ولأن تجمع بريكس تقيل جدا ومتوقع ليه مستقبل كبير فوجود مصر في وقت مبكر مهم جدا وكمان ودا الأهم أن مجموعة بريكس بتسعى للتكامل الاقتصادي بين الدول الأعضاء وفيه مقترحات وخطط مهمة جدا في النقطة دي تحديدا منها اعتماد عملة خاصة ببريكس في التبادل التجاري والمالي أو التعامل بالعملات الوطنية للدول الأعضاء ودا معناه أن الدولار مش هيكون عملة تعامل أو تداول بين الدول دي .
اكيد موضوع العملة بديل الدولار دا هينفع مصر تحديداً بسبب الأزمات اللي عندنا واللي سببها الدولار الأمريكي ولو عرفنا أن حجم التبادل التجاري بين مصر والدول الأعضاء في بريكس بيقرب على 40 مليار دولار ولو مصر وفرت المبلغ ده فأكيد سوق الصرف عندنا هيستقر اكتر ويكون العرض فيه اكتر من الطلب ولما البريكس يعتمد عملة جديدة مصر هتوسع نشاطها وتحول جزء كبير من تعاملاتها التجارية لمنطقة البريكس عشان توفر دولار.
طيب أمتي البريكس هيعتمد العملة البديلة للدولار ؟
روسيا والصين اكتر دولتين متحمسين للموضوع دا عشان العقوبات المالية اللي فرضتها الولايات المتحدة على الدولتين وكان الدولار هو محور العقوبات دي وعشان كده الرئيس الروسي فلاديمير بوتين متحمس جدا وقال في تصريحات أن البحث عن بديل للدولار داخل بريكس بقي مسألة حياة أو موت وطرح مقترح بخصوص الاستغناء عن العملة الأمريكية هيتم مناقشته في قمة بريكس الجاية في 22 اكتوبر الجاري بين قادة الدول الأعضاء ومصر هتكون حاضرة بقوة طبعا.
طيب ايه الجديد في موضوع بريكس ؟
من ساعات محافظ البنك المركزي المصري حسن عبد الله شارك في الاجتماع التاني لوزراء المالية ومحافظي البنوك المركزية لمجموعة "بريكس" بالعاصمة الروسية موسكو وتم في الاجتماع دا مناقشات موسعة بين محافظي البنوك المركزية المشاركة في مجالات التعاون الاقتصادي ونظم الدفع وتطبيقات الذكاء الاصطناعي والاستدامة وأمن المعلومات في القطاع المالي، والتقى عبد الله على هامش الاجتماعات مع رئيسة البنك المركزي الروسي ونائبها الأول لمناقشة العديد من القضايا المشتركة.
واللي يهمنا في الاجتماع دا هو مسألة نظم الدفع واللي بتتعلق بنظام الدفع المقترح بيين الدول الأعضاء بعيدا عن الدولار ومتوقع جدا القمة الجاية تاخد قرار حاسم فيه وبكده هتبقي ضربة عالمية للدولار الامريكي.
