لو عايز تاخذ قرض بدون فوايد 2025.. شوف هتجيبه منين وإزاي
كل الناس حاليا بتدور علي مشروع يكون لهم سند، بس طبعا الفلوس هيا اساس اي مشروع في الدنيا، وده للاسف مش موجودة عند كل الناس بس أنا دلوقتي هقولك علي حل هيخلصك من كل المشاكل دي وهتعمل مشروع بمنتهي الاريحية.. خليكم معانا للآخر
كلنا عارفين شايفين وحاسين بالظروف الاقتصادية اللي البلد بتمر بيها، خصوصا اننا جزء من الظروف دي، ولها تاثير مباشر علينا في الاسعار، والظروف دي خلت في عزوف من ناس كتير جدا عن فكرة عمل المشروعات خصوصا أن اي مشروع دلوقتي محتاج فلوس وبأرقام كبيرة جدا، وطبعا دي مش متوفرة مع أغلبنا.
وقبل ما تبدأ تحسب حساباتك وتعيد الذكريات عن فكرة المشروع اللي في دماغك وترجع تسال نفس السؤال هجيب منين، أنا دلوقتي هقولك علي حل هيخلصك من الأزمة دي والحل ده قدمه بنك ناصر واللي اعلن عن تقديم قروض بدون فوايد وبتوصل القروض لـ10 آلاف جنيها.
بنك ناصر، أعلن عن طرح قروض بدون فوايد واتاح للمواطنين امكانية سدادها علي أقساط شهرية لفترات طويلة بتوصل لـ 3 سنين، والقروض دي بتكون بمصاريف إدارية بسيطة، وكمان في حالة وفاة الشخص اللي واخذ القرض بيتم إلغاء الدين بشكل كامل.
طيب إيه الشروط اللي حددها بنك ناصر علشان يمنح العملاء قروض بدون فوايد؟.
بنك ناصر حدد شوية شروط لمنح القروض بدون فوايد، والقروض دي متاحة لاي شخص، واولها انه في حال الاقتراض بضمان المرتب، لازم تكون مدة الخدمة الفعلية متقلش عن 3 سنين، وكمان العميل يجيب ضامن من العاملين بالجهاز الإداري للدولة، ويوقع علي اقرار لتحويل القسط أو المرتب على البنك.
بنك ناصر حدد حالة كمان، للناس اللي عايزين قروض بضمان المعاش الافتراضي، واشترط أنه في تكون مدة الخدمة الفعلية متقلش عن 20 سنة، وكمان توقيع اقرار بتحويل القسط أو المرتب على البنك، وفي حالة الاقتراض بضمان المعاش، بالبنك اشترط تحويل القسط أو المعاش على البنك، وفي حالة المعاش المستحق يتم تقديم ضامن من العاملين بالجهاز الإداري للدولة.
اما عن خطوات التقديم على قرض بدون فوائد والمستندات المطلوبة للحصول علي القروض فالبنك حددها للعملاء وهتكون من خلال زيارة أقرب فرع لبنك ناصر الاجتماعي وتقديم المستندات المطلوبة وهيا صورة بطاقة الرقم القومي للمقترض والضامن بشرط أن تكون سارية، والرقم الأمينى للمقترض والضامن والمستفيد، وتقديم بيان مفردات مرتب او معاش للمقترض ومرتب الضامن، وفي حال الاقتراض علشان حالات الزواج بيتم تقديم أصل وثيقة عقد الزاوج بالنسبة للمسلمين أو الطوائف المسيحية، بالإضافة الي تقديم شهادة طبية حديثة معتمدة من أحد المستشفيات التابعة لوزارة الصحة في حال قرض العلاج، وفي حال الحالات الملحة الطارئة بيتم تقديم المستند اللي بيدل على الحالة معتمد من جهة الاختصاص، ولازم يكون مختوم بختم شعار الجمهورية .
