هدية من البنوك لأصحاب المعاشات.. شوف إيه اللي هيحصل
أكتر من 10 مليون مواطن في مصر بيستحقوا المعاشات كل شهر، وعشان أصحاب المعاشات من أهم الفئات اللي بتهتم بيهم الدولة، فقررت توفر لهم خدمة جديدة.
والخدمة دي ببساطة بتتخلص في توصيل المعاش للمنزل شهريا، من غير ما الشخص المستحق يدب مشوار للبنك أو لمكنة Atm عشان يصرف معاشه.
عشان كده، البنوك بتقدم دلوقتي خدمة الزيارات المنزلية اللي بيقوم بها موظفي البنوك للمسن، وتقدم له الخدمات اللي هو عايزها زي المعاش من غير ما يروح لحد البنك.
وكان مشروع قانون رعاية حقوق المسنين، اللي أقره مجلس النواب، ألزم البنوك بتوفير خدمة توصيل المعاش الخاص بالمسن أو المساعدة المستحقة للمسن الأولى بالرعاية لحد محل سكنه.
ومن هنا، ممكن صاحب المعاش يطلب الخدمة أو الميزة دي، للحصول على المعاش لحد المنزل، وده بيتم من خلال المواقع الإلكترونية للبنوك المصرية.
والطريقة هي، إن حضرتك هتخش على خدمات المواطنين وكبار السن على موقع البنك، بعدين تحدد اختيار طلب زيارة منزلية لكبار السن وتحدد الخدمة المطلوبة، أو تتصل بخدمة العملاء للبنك التابع له، وتطلب الخدمة بكل بساطة.
والبنوك المصرية، بتيح للعاملين العديد من الخدمات، ومنها تحويل المرتبات وتوصيلها للمنزل، وفتح الحسابات والتقديم على قروض ميسرة لأصحاب المعاشات وكبار السن، والتقديم على الودائع والشهادات دون الحاجة للذهاب إلى البنك، وغيرها من الخدمات للتسهيل على العملاء واللي بينهم كبار السن.
