قنبلة مدبولي.. إيه اللي هيحصل لو مصر دخلت اقتصاد الحرب

الأمور لو استمرت كده ممكن ندخل في اقتصاد الحرب.. دي القنبلة اللي ألقاها الدكتور مصطفى مدبولي امبارح في وشنا كلنا.. ايه هو اقتصاد الحرب وإيه اللي هيحصل لو مصر وصلت للمرحلة دي.. تعالوا نشوف التفاصيل في الفيديو دا تابعونا للنهاية

من كام ساعة الدكتور مصطفي مدبولي عمل مؤتمر صحفي مع وزيري الاستثمار والمالية واتكلم في حاجات كتير عن الاقتصاد والظروف اللي حولينا ولأول مرة تكون نبرة مدبولي تشاؤمية ومخيفة وفي احساس بالقلق الشديد ولأول مرة مدبولي يتكلم بسوداوية عن اللي بيحصل حولينا في المنطقة والحقيقة عنده حق لأن الظروف دي مصر دفعت تمنها غالي جدا من مليارات الاموال الساخنة ومليارات قناة السويس والاستثمار المباشر وارتفاع تكلفة الاستيراد وتحديات قطاع السياحة والسفر وغيرها اللي دخلتنا في حسبة برما مع الدولار والسوق السودا والغلاء وارتفاع الأسعار والضغط على الموازنة ولو أي دولة غير مصر كانت شبه انهارت من الأزمات اللي حوليها من كل حتة.

رغم إن مصر قدرت تقاوم الظروف دي وتتحدى العاصفة والتيار لكن استمرار الأزمات اللي في المنطقة خلي الدكتور مصطفي مدبولي يحذر من التداعيات الخطيرة وقال صراحة ان استمرار الكوارث دي بيهدد من اقترابنا من اقتصاد الحرب.. أيوا زي ما حضرتك سمعت اقتصاد حرب..

قبل ما تتخض هنشرحلك الأول يعني ايه اقتصاد حرب؟
دا مصطلح أطلقه الاقتصاديين على الاقتصاد لاي دولة بتكون في حالة حرب مباشرة أو بتواجه خطر شديد أو اتعرضت لكارثة طبيعة مدمرة وببساطة كده يعني الدولة بتوجه أغلب موارده للانفاق على المجهود الحربي لو كانت في حالة حرب مباشرة أو بتوجه مواردها لمواجهة التحديات الاقتصادية لأي أزمة حوليها أو بتواجهها بشكل غير مباشر أو لإصلاح وإعادة الاعمار في حالة اتعرضت لأزمة أو كارثة كبيرة زي زلزال مدمر مثلا.

ومشكلة اقتصاد الحرب إنه بيغير خريطة الخطط الجكومية وأولويات الانفاق وبيعتمد على الترشيد والتقشف وزيادة الموارد في نفس الوقت يعني ببساطة كده اقتصاد الحرب أو اقتصاد الأزمة زي واحد دخله كويس وفجأة حصلت عنده مصيبة ومحتاج فلوس كتيرة عشان يخلص من الأزمة دي فبيضطر يستغني عن حاجات كتير عشان يوفر فلوسه لحل مشكلته.

وبالنسبة للحالة المصرية فزي ماقال رئيس مجلس الوزراء إن الوضع الدولي والاقليمي يمر بمرحلة حرجة لم يشهدها العالم من قبل وضرب مثل بسعر برميل البترول واللي زاد 10% خلال الأسبوع اللسي فات بس، ودا عمل ضغط كبير جدا على الدولة المصرية نتيجة الارتفاع دا.. ودا معناه استنزاف اضافي للدولار والعملة الصعبة ممكن يأثر على سعر الصرف وسعر الدولار يرفع واحنا عارفين إيه اللي بيحصل لما الدولار بيزيد.

كمان اقتصاد الحرب بيخوف المستثمرين ورؤوس الأموال لأن استمرار التوتر في منطقة لفترة كبيرة معناه عدم استقرار .

مدبولي اتكلم بصراحة وقال إن الحكومة المصرية حاليا بتواجه تحديات غير مسبوقة، وبتتعامل مع اضطرابات الوضع الدولي والإقليمي بحزمة من القرارات، وإن المنطقة لو دخلت في حرب إقليمية مصر تدخل في وضع شديد ممكن يوصل لوضع اقتصاد حرب.

أزمة الدولة لو دخلنا في اقتصاد الحرب هتكون في تحقيق معادلة صعبة جدا وهي إنها تواجه وتتحمل التكاليف الزيادة والتبعات وفي نفس الوقت تحاول على قد ما تقدر المواطن العادي والفئات البسيطة ما تتأثرش من اللي بيحصل.