إزاي تدفع المصروفات الدراسية لأولادك من "انستاباي"
الدراسة بدأت ومعاها بتبدأ المدارس تطالب الطلاب بسداد المصروفات الدراسية، ومن هنا بيحتار أولياء الأمور في اختيار طريقة الدفع، يا ترى يعملوا مشوار للمدرسة عشان يدفعوا ولا في طرق تانية أسهل.
من هنا بتيجي أهمية تطبيق "انستاباي"، اللي بيتيح لكل ولي أمر دفع مصروفات المدرسة من خلاله وهو قاعد على الكنبة.
أما الطريقة، فهي إن حضرتك هتخش على تطبيق البنك المركزي إنستاباي، وتختار أوبشن "التعليم"، وبعد كده تدخل كود الطالب، ومن هنا هتظهرلك بيانات الطالب، اختار المدرسة أو الجامعة، بعدين اضغط على كلمة متابعة، هتظهر لك قيمة المصروفات، هتروح لخانة الدفع وتضغط تأكيد، وبس كده.
ونقدر نقولك كمان، إن بالإضافة للخدمة دي، فانستاباي بيتمتع بخدمات كتيرة، زي ربط حساباتك لدي البنوك المختلفة على تطبيق هاتف محمول واحد، بالإضافة للتحويل اللحظي لمختلف الحسابات والبطاقات والمحافظ الالكترونية، وكمان طلب استقبال مبلغ محدد من عملاء المنظومة، وممكن جدا تستعلم عن الرصيد، وتتبرع كمان للجمعيات الخيرية.عمليات التبرعات.
وبتقوم البنوك العاملة داخل جمهورية مصر العربية بتقديم خدمات انستاباي من خلال التحويل لجميع البطاقات المصرفية داخل جمهورية مصر العربية بما يشمل بطاقات الائتمان، وكمان سداد فواتير المرافق من كهرباء ومياه وغاز وشحن الأرصدة عبر خدمات إنستاباي، بالإضافة لسداد المصروفات الدراسية.
لكن رغم الفوايد الكتير اللي بيقدمها تطبيق "انستاباي"، واللي هو أصبح الأكثر استخداما في المعاملات المالية بين المصريين، إلا أن في بعض المستخدمين بيسنوا كلمة السر أو الباسورد، وهنا مابيقدروش يتعاملوا وحالهم بيقف.
طب لو نسيت كلمة سر انستا باي IPN تعمل إيه؟
بص يا سيدي، كلمة السر IPN هي رقم سرى خاص بالحساب على شبكة المدفوعات الحظية "انستا باي"، وبيكون مكون من 6 أرقام فيتم تعيينهل بواسطة العميل لكل حساب أول ما يعمله، ومن هنا يقدر يستخدم الرقم السري للتصديق على جميع المعاملات اللي بيتم من خلال تطبيق انستاباي، عشان تتأكد من هوية العميل.
أما لو حضرتك نسيت كلمة السر، فممكن جدا تستعيدها من تاني من خلال الدخول إلى إدارة الحسابات، بعدين هضغط على الحساب اللي عايز تعمل له كلمة سر جديدة بعدين تضغط على إعادة ضبط/ إلغاء حظر رقمك السري IPN.
بعد كده، هتدخل بيانات بطاقة الدفع الإلكتروني الخاصة بك والرقم السري الخاص بها، وهتجيلك رسالة نصية قصيرة فيها كلمه السر لمرة واحدة OTP.
هتدخل OTP في المكان المخصص لها، وهتقوم بتعيين رقم سري IPN جديد، بس لازم تتأكد تأكد الرقم السري أكتر من مرة.
