"محدش عارف مخبي إيه".. ليه الدكتور مدبولي خايف من بكرة
إيه اللي قاله الدكتور مصطفى مدبولي النهاردة وليه خايف من بكرة وايه علاقة الاقتصاد باللي قاله ومصير الدولار والتحديات المالية في الأيام الجاية.. كل ده وتفاصيل تانية هتعرفوها في الفيديو ده.
النهاردة الدكتور مصطفى مدبولي رئيس الحكومة فتك قلبه واتكلم على غير عادته بنبرة حزينة واستعرض التحديات الاقتصادية اللي مصر بتواجهها اليومين دول بسبب اللي بيحصل حولينا وقال مدبولي، إن المنطقة بتمر حاليا بمرحلة إقليمية وعالمية غير مسبوقة ويتستدعي حوار مستمر مع النخبة المصرية لمواجهة التحديات بشكل جماعي.
رئيس الحكومة قال إن مصر بتعيش حاليا في مرحلة فارقة واستثنائية وغير مسبوقة بسبب الأحداث في العالم والمنطقة مشفتهاش من سنين طويلة وان خطورة الأزمات دي ان وتيرتها سريعة جدا لدرجة أن مفيش دولة في العالم تقدر تتوقع بكرة هيحصل ايه ودا لأن الأحداث بقت فوق طاقة اي دولة وبالتالي مفيش دولة ولا حكومة تقدر تحط خط وتصورات عشان تواجه اللي جاي بسبب السرعة في تغير الأحداث.
مدبولي في لقاءه النهاردة مع عدد من القامات الفكرية في مقر مجلس الوزراء بالعاصمة الإدارية الجديدة اتكلم كتير عن الوضع الاقتصادي والأمن القومي المصري وقال إنه رغم التحديات الخطيرة لكن الاقتصاد المصري بخير وضرب مثال على تراجع الدين الخارجي لمصر واللي انخفض اكتر من 15 مليار دولار خلال 6 شهور فقط وإن الحكومة شغالة بكل جهدها على إصلاحات اقتصادية زي تمكين القطاع الخاص، و النزول بالتضخم لأقل من 10 % خلال نهاية 2025.
مدبولي اتكلم كمان عن قناة السويس واللي فقدت أكتر من 60% من إيراداتها يعني 6 مليار دولار ونتيجة لدا الدولة خسرت وبتخسر مابين 550 و600 مليون دولار كل شهر ودا رقم كبير جدا وكانت الدولة بتستفاد بيه في تلبية احتياجات الدولة، وقال كمان إن الصراعات الجيوسياسية هي السبب الرئيسي في ارتفاع أسعار السلع والخدمات، واضطراب حركة التجارة، وزيادة تكلفة التأمين على الشحن وقفزات التضخم وإن مصر بتواجه تحديات اقتصادية غير مسبوقة ودا بيحتاج جهد غير عادي من الحكومة عشان تخفف الأعباء على قد ما تقدر على المواطن في نفس الوقت مطلوب منها تحافظ وانتبه لمقومات الأمن القومي المصري، وهو يشمل الأمن العسكري والسياسي والاقتصادي والتنمية وأهمية تقديم الخدمات الأساسية للمواطنين بأقل أعباء ممكنة في ظل الظروف الحالية.
مدبولي اتكلم كمان إن وسط كل التحديات دي مصر قدرت تحقق طفرات اقتصادية وخاصة في مجال الاستثمار والصناعة والتنمية ودا بفضل حالة الاستقرار الكبير في مصر واللي خلاها سوق جاذبة لرؤوس الأموال العالمية وإن الحكومة قدرت تجهز وتطرح ولسه هتطرح مناطق تانية للاستثمار.
طيب ليه الدكتور مدبولي قال الكلام دا دلوقتي ؟
الحقيقة رئيس الحكومة طلع النهاردة واتكلم عن التحديات والمخاوف والمخاطر عشان يحط المصريين في الصورة ويعرفوا حجم الخطر اللي حولينا وإن الحكومة مش بتكره الشعب وبتحمله فوق طاقته بالعكس دي بتحارب الزمن والظروف عشان تشيل من عليه تبعات اللي بيحصل وعشان كمان الحكومة تقطع الطريق على منصات الفتنة والشر واللي بتستغل الأوضاع الاقتصادية وتنفخ في النار وبتحاول تهز الثقة في الدولة والحكومة.
