هتوصل لـ50%.. شوف معاد تطبيق الزيادات الجديدة في أسعار تذاكر المواقع والمتاحف
اتعودنا كل فترة ان أسعار تذاكر دخول المواقع الأثرية والمتاحف زيها زي اي حاجة في البلد بتزيد كل فترة وحاليا في زيادة جديدة هتحصل في أسعار التذاكر في شهر نوفمبر للي جاي.. يا تري الزيادة الجديدة هتوصل لكام وهل هتكون علي كل التذاكر ولا فئات محددة.
من فترات بعيدة الدولة بدأت خطة تطوير الخدمات السياحية بالمواقع الأثرية والمتاحف وتطوير الخدمات دي بيحتاح مصروفات وفلوس كتيرة علشان الدولة تجهز الخدمة اللي تليق بالسائح والزائر المصري والأجنبي وعلشان تكون المتاحف والمواقع الأثرية عندنا زيها زي اي موقع اثري علي مستوي العالم وكمان تكون احسن خصوصا أن مصر عندها مقومات اثرية وحضارية مش موجودة في كل كتير حوالين العالم.
تطوير الخدمات السياحية الدولة أخدته هدف فعلا وبدأت تطبيقه علي أرض الواقع بالشراكة مع القطاع الخاص، وفعلا بدأت نتائج التعاون ده تظهر في عدد كبير من المواقع الأثرية واولهم كانت منطقة الأهرامات واللي كانت مفهاش اي خدمة للسائحين وابسطها الحمامات واللي ماكنتش موجودة ولما اتوجدت كانت سيئة جدا ولا تليق بدولة كبيرة في قطاع السياحة والآثار زي مصر، ولكن حاليا الموضوع اتغير خالص ومنطقة الأهرامات بقي فيها حمامات مكيفة دي غير المطاعم اللي علي كل المستويات ده غير الاتوبيسات الكهربائية واللي بقت موجودة في المنطقة لنقل السائحين للاستمتاع برؤية الاهرامات وتمثال ابو الهول وغيرها من الآثار الموجودة في المنطقة .
تجربة تطوير الخدمات السياحية زي ما هيا فادت السائح وأصبحت بتقدم خدمات ماكنتش معروفة ولا موجودة قبل كده، كمان قدمت دخل إضافي للدولة خصوصا أن القطاع الخاص بيدخل يدخل حاجات وخدمات جديدة ماكنتش موجودة قبل كده في مصر زي الحفلات اللي بقت تظهر في المناطق الأثرية ده غير الافراح والمناسبات المختلفة والاحتفالات الدولية والعالمية واللي بقت بتستقطب ابرز المشاهير حوالين العالمين علشان يجي مصر يعمل فرح أو حفلة أو مناسبة في مكان مميز وتم ن الخلفية بتاعته الاهرامات أو معبد معين خصوصا أن المعابد والآثار المصرية لبها قبول عالمي واي حد نفسه يعمل مناسبة خاصة في مكان اثري .
طيب اية اللي هيحصل بعد كده في المواقع الأثرية ؟.
في الفترة اللي جاية وتحديدا شهر نوفمبر اللي جاي الدولة هترفع أسعار دخول تذاكر المواقع والمتاحف الأثرية والزيادة دي هتتكرز علي تذاكر الأجانب خصوصا أن سعر صرف الدولار ارتفع لأكتر من 48 جنية وكانت آخر زيارة في أسعار تذاكر دخول المواقع الأثرية في يناير 2023، وهنا كان لازم الدولة ترفع اسعار تذاكر دخول المواقع الأثرية علشان تكون ماشية مع أسعار صرف العملات الأجنبية في البنوك، واللي ارتفعت هيا كمان مع قرارات الدولة بتحرير سعر الصرف بشكل مرن .
الزيادة الجديدة اللي المجلس الأعلى للآثار أقرها هتوصل ل50% من الأسعار الحالية لتذاكر السائحين الأجانب وفعلا المجلس الأعلى للآثار بعت الأسعار الجديدة لغرفة شركات السياحة واللي بدورها هتعلنها علي الشركات هتتبدأ يشتغلوا بيها من اول شهر نوفمبر اللي جاي.
وزارة السياحة والآثار قالت إن الزيادة الجديدة جت بسبب التحريك العادي لأسعار صرف العملات الأجنبية مقابل الجنية المصري، وهتكون الزيادة علي أسعار تذاكر المصريين محدودة للغاية
