أزمة بـ45 مليار دولار.. ورطة مدبولي وحل الوزير
عارفين ايه أزمة مصر من الستينيات وايه اللي خلي الدولة تلف حولين نفسها عشرات السنين من غير تقدم اقتصادي حقيقي.. تعالوا نشوف إيه الحكاية وازاي مصر قدرت تعرف الطريق الصحيح وحكاية الـ45 مليار دولار اللي عاملين صداع للحكومة.. خليكم معانا للآخر وهتعرفوا التفاصيل في الفيديو ده
أزمة مصر إنها مستغلتش الفرص اللي جتلها عشان تتحول لعملاق اقتصادي وصناعي وعشان تبقي عارفين مصر بدأت مع الهند كوريا الجنوبية وقبل اليابان لكن الدول دي شقت طريقها زي ما احنا شايفين وبقت من اقوى اقتصاديات العالم ومصر فضلت في مكانها بسبب أزمات وحروب وصراعات اتورطت فيها واستنزفت مواردها ووقفت حال الاستثمارات والتنمية والنتيجة مصر اتحولت لأكبر سوق استهلاكي في الشرق الأوسط وبقينا مستوردين ومش بنصدر قد ما بنستورد وبقي عندنا للاسف هوس استيراد يعني نستورد اي حاجة حتي لو ماكنتش مهمة واهملنا التصنيع المحلي واللي بقت سمعته سيئة بسبب الإهمال وعدم الجودة وظهرت عقدة الخواجة لغاية ما فاتورة الاستيراد قربت على 100مليار دولار.
بالأرقام مصر بتصدر بحوالي 45 مليار دولار وبتستورد بين 90 و95 مليار دولار في السنة يعني فيه متوسط فجوة 45 مليار دولار ودي أكبر أزمة ممكن تواجه اي حكومة في العالم لأن الحكومة مطالبة بتوفير 45 مليار دولار الفرق من جيبها يعني من مواردها وبالتالي هيكون فيه طلب دايم على الدولار وسعره هيزيد غير الضغط الكبير على الموازنة العامة والمصروفات ودا غير التزامات الدولة التانية من العملة الصعبة زي أقساط الديون ومستحقات الشركات العالمية اللي شغالة في مصر وتوفير الدولار المستوردين وأصحاب المصانع والشركات لشراء لوازم الإنتاج.
طيب ليه الاستيراد خطر في حد ذاته وازاي بيهدد الأمن القومي ؟
مفيش شك أن الاستيراد بشكل كبير بيمثل في حد ذاته خلل استراييجي وتهديد الأمن القومي لانه لو حصلت اي أزمة عالمية فيه حاجتين هيحصلوا أولها الأسعار هتزيد ودا معناه تكلفة زيادة وارتفاع الأسعار محليا بشكل كبير وتاني حاجة ممكن تحصل هي أن الدولة منقدرش تستورد لأي ظرف من الظروف زي الصراع اللي احنا فيه دلوقتي واللي امتد لخطوط الملاحة الدولية وهنا هتحصل أزمة كبيرة في الأسواق ومثلا دولة زي مصر بتستورد اغلب السلع الرئيسية زي القمح مثلا لو حصل ظرف دولي والاستيراد وقف دا اكيد هيهدد الأمن القومي الغذائي للمصريين.. عشان كده الاستيراد المتزايد خطر كبير على مصر .
طيب الحكومة عملت ايه عشان تصحح الخلل دا؟
زي ما قلنا قبل كده مكانش فيه خطط واضحة لحل أزمة الاستيراد وعقدة الخواجة لأن دا كان محتاج صناعة قوية وضخمة والصناعة محتاجة بنية أساسية قوية وحديثة والبنية الأساسية كانت محتاجة تمويل وتخطيط ونبقى عارفين هنعمل ايه فين وليه ودا اللي بدأ يحصل مع وصول الرئيس السيسي للحكم ولاول مرة نحس إن فيه خطط قريبة ومتوسطة وطويلة الأجل للتنمية وإن فيه نظرة مستقبلية محسوبة بالشعرة في كل قطاع اقتصادي ولأول مرة نحس إن فيه تخطيط لكل حاجة..
وشفنا إزاي السيسي بدأ بالبنية الأساسية الحديثة وتحديث البنية التشريعية اللي كانت عائق وبتطفش رجال الأعمال والمستثمرين والشركات العالمية وبعدها بدأت خطة توطين الصناعة بكل أنواعها عشان نصنع المنتجات البديلة المستورد من ناحية وفي نفس الوقت يكون عندنا فائض صناعة نصدره بره وبكده يبقي انا وفرت دولار من ناحيتين وشغلت الشباب العاطل وبقي عندي صناعة وبتطور وبتتوسع .. الحكومة حطت خطة ال100 مليار دولار صادرات كمرحلة أولى عشان تعدل كفة الميزان ودي اللي بيعمله دلوقتي الفريق كامل الوزير وزير الصناعة.. وبتخطط توصل إلى 300 مليار دولار ايرادات في السنة واللي هتتحقق طالما فيه تخطيط صح.
