بره الصندوق.. شوف الدولة هتتعامل ازاي مع ارتفاع استيراد الأعلاف

الفترة اللي فاتت واللي مصر انفقت فيها ارقام كبيرة لاستيراد الإعلاف خلت الحكومة تعيد نظرها في نسبة كبيرة من الأراضي ونوعية الرزاعة الموجودة فيها، وفعلا الدولة بدأت تشجع الفلاحين علي زراعة أنواع محددة.. واحدة من الأهداف دي هيا زراعة الذرة.. ياتري اية اللي بتعمله مصر علشان تأمن انتاج الإعلاف .. واية اللي بتستهدفه مصر من زراعة محصول الذرة.

علي مدار الشهور اللي فاتت الدولة انفقت ارقام ضخمة لاستيراد الاحتياجات الاساسية للسوق المصري، والاعلاف واحدة من الحاجات اللي كانت عليها مشاكل كبيرة في السوق المصري خصوصا أنها تسبب في ارتفاع اسعار اللحوم في الاسواق بشكل كبير جدا، وبسببها اسعار اللحوم وصلت عندنا لارقام قياسية.
طيب اية اللي عملته الحكومة علشان تحل ازمة الأعلاف وتعالج ارتفاع اسعار اللحوم في الاسواق؟.

قطاع الاعلاف كان واحد من القطاعات اللي الدولة خصصت نسبة كبيرة جدا من المخصصات الدولارية علشان تسد فجوة نقص المعروض في السوق المصري، خصوصا أن الأزمة دي تسبب في وصول اسعار اللحوم لارقام فلكية وبالتالي سببت ازمة كبيرة في الشارع المصري، وبالتالي التسهيلات اللي قامت بيها الدولة لاتاحة الدولار استهدفت برضوا توفير الاعلاف. 
وزي ما احنا عارفين أن الدولة حاليا بتستهدف تقليل فاتورة الاستيراد بشكل كبير وزيادة فاتورة التصدير، وعلشان كده الدولة استهدفت زيادة انتاجها من محصول الذرة خصوصا أنها بتعد العصب الرئيسى في صناعات اللحوم البيضاء والحمراء والبيض والألبان ومنتجاتها والأسماك، ده غير دخولها في صناعة النشا والجلوكوز والزيوت.
الخطة اللي حطتها الحكومة لزيادة انتاجية الأعلاف استهدفت مضاعفة معدلات إلانتاج والوصول لمعدلات الاكتفاء الآمن وتقديم كل أشكال الدعم من وزارة الزراعة لإنتاج تقاوي جيدة تتماشى مع التغيرات المناخية ووصلت المساحة اللي بتزرعها مصر في السنة اللي فاتت لـ3 مليون فدان .
وزارة الزراعة واستصلاح الاراضي قالت أن الأنتاج المحلي من محصول الذرة بيكفي من 40 إلى 45% من احتياجات السوق المصري، ومصر بتستورد الكمية اللي بتحتاجها واللي بتوصل لـ 8 مليون طن من الذرة الصفراء من الخارج، وفي الفترة اللي فاتت الدولة طورت أكثر من 78 نوع من تقاوي الذرة الصفراء، وتم التوصل إلي 22 نوع حاليا قادرة علي تحمل الملوحة من 800 إلى 1000 جزء فى المليون، وحاليا الوزراة بالتعاون مع معاهد البحوث الزراعية بتستهدف تقليل الاعتماد على الاستيراد في التقاوي والاعلاف خصوصًا انواع الذرة الحمراء واللي بتحتوي على نسبة عالية من البروتين  وبتكون خيار أول لمربين الدواجن .

وزارة الزراعة، قالت كمان أنها بتستهدف زيادة المساحات المنزرعة بمحصول الذرة بسبب ربحيته العالية للمزارع، ومدة زراعته لا تتعدى الـ  100 يوم، وبتبدا الزراعة في مايو وبيكون الحصاد في شهر سبتمبر، وبتوصل إنتاجية الفدان إلى 30 أردب، وبالتالي بيكون عليها اقبال كبير من المزارعين في الزراعة الصيفية .