غرف الابلكيشنز السرية.. إيه اللي بيحصل في سوق الأدوية

 
أزمة نقص الأدوية اللي السوق المصري بيعاني منها من شهور طويلة، فتحت علي مصر ازمة جديدة مش هتقدر تتخلص منها علي مدار فترة قريبة، وللاسف تاثيرها هيكون بشكل مباشر علي المرضي.. ايه هيا الأزمة دي واية هيا خطط مواجهتها .. خليكم معانا للآخر وهتعرفوا التفاصيل 

من فترات طويلة وسوق الأدوية في مصر بيعاني من نقص شديد في أنواع كتيرة من الأدوية خصوصا أدوية الأمراض المزمنة، ونقص الأدوية وده لان فيه شركات وبعض الكيانات غير الصيدلانية انتهكت قانون مزاولة مهنة الصيدلة وعملت تطبيقات وصفحات إلكترونية لبيع وتداول الأدوية العلاجية تحت بند مواكبة التطور التكنولوجي وتسهيل وتوفير الوقت والموضوع ده فتح باب دخول أدوية مغشوشة ومهربة إلى البلاد ودخلت بطرق غير شرعية وغير حاصلة علي الموافقات للازمة للتشغيل .

في الفترة اللي فاتت في تطبيقات كتيرة قوي انتشرت في سوق الأدوية، واحد من ابرز التطبيقات دي هو تطبيق بريد فاست، اللي بدأ نشاطه في مجال بيع المخبوزات، وبعدين توسع لبيع الأدوية العلاجية، ومنها أدوية وصفية ونفسية بتحتاج لصرفها إشراف طبي وروشتة طبية.

الدكتور محفوظ رمزي، رئيس لجنة التصنيع الدوائي بنقابة صيادلة القاهر، حذر المرضي من شراء الادوية عن طريق التطبيقات، خصوصا أن صرف الدواء للمرضى مش زي باقي السلع اللي ممكن المواطن يشتريها من المولات والمحال التجارية، وحضور المريض للصيدلية هدف ضروري علشان يعرف تاريخه المرضي ويتأكد كمان ان مفيش اي تعارض بين الدواء اللي هيشتريه مع أدوية تانية .

هيئة الدواء، اكدت على عدم قانونية التطبيقات والصفحات اللي بتروج لبيع الأدوية العلاجية، خصوصا أنها مش اخذت اي تراخيص لبيع الأدوية، وقالت أنه الهيئة بتحاول بكل الطرق أن ترصد الكيانات دي وبيتم ابلاغ الجهات المعنية عنها علشان يصدر قرارات باغلاقها .

هيئة الدواء قالت كمان، أنها شكلت إدارة لرصد جرائم الإنترنت ودي معنية برصد أي بيع إلكتروني غير مصرح به، وبتقدم بلاغات عن الكيانات والتطبيقات دي للهيئة الوطنية للإعلام وجرائم الإنترنت بوزارة الداخلية، ولحد اللحظة دي الهيئة رصدت 147 مخالفة إلكترونية من تطبيقات وصفحات إلكترونية على مختلف منصات التواصل الاجتماعي لبيع الأدوية، وفعلا تم إغلاقها والتعامل معها.

الهيئة قالت كمان أن اي صيدلية هيثبت تعاملها في بيع الأدوية من خلال التطبيقات الالكترونية، هيتم تشكيل لجنة للتفتيش عليها ومراجعة رصيد الأدوية وحركة البيع بها للتاكد من عدم وجود أدوية مغشوشة بين الأدوية اللي بتقدمها للمواطنين .

الهيئة نصحت المواطنين بعدم شراء الأدوية من خلال التطبيقات واللي اغلبها بتستغل المواطن وبتبيع له ادوية أغلبها غير مرخص ومش سليم، خصوصا أن الدولة علي مدار الشهور اللي فاتت قامت بمجهود كبير جدا لتوفير الأدوية للمواطنين وخصوصا أدوية الأمراض المزمنة وفعلا أكثر من 90% من الأدوية اللي كانت ناقصة بقت موجودة ومتاحة للمواطنين في كل الصيدليات .