BMW ونيسان ورانج روفر .. شوف إزاي تشتري عربية مستوردة من الجمارك بأقل سعر؟
كتير من المصريين عايزين يشتروا عربية مستوردة من مصلحة الجمارك المصرية، لأن أسعارها بتكون أقل، وكمان هتكون عربية ماركة عالية زي "بي إم دبليو ورانج روفر ونيسان" وغيرها، يعني مضمونة ومش هاتتغش.. عشان كده هنقولك التفاصيل خطوة بخطوة في الفيديو ده، فتابعنا للآخر.
مصلحة الجمارك المصرية، دلوقتي بتسعى أنها تقدم خدمات شراء العربيات المستوردة والمستعملة وكمان قطع غيارها، عشان تلبي احتياجات قطاع كبير من المواطنين في شراء العربيات اللي جاية من بره مصر.
عشان كده، المصلحة حريصة دايما على أنها تعمل مزاد علني واللي بيحصل وفقا لقانون التعاقدات الحكومية بشروط ميسرة.
طب لو أنا عايز اشتري عربية مستوردة.. أعمل إيه؟
بص يا سيدي، حضرتك لازم تعرف ان في شروط عشان تقدر تخش المزاد ده، واللي منها شراء كراسة الشروط بقيمة 400 جنيه من مقر الهيئة العامة للخدمات الحكومية التابعة لوزارة المالية في منطقة الدقي.
كمان لازم يتم معاينة العربية اللي حضرتك عايز تشتريها قبل الدخول في المزاد، ومتاح إنك تاخد معاك شخص عنده خبرة في معاينة العربية.
وبالنسبة بقى للمستندات المطلوبة، فهي: بطاقة رقم قومي سارية للمشتري، بطاقة ضريبية سارية للتجار.
بس لازم عشان تخش المزاد، تسدد تأمين قيمته 10,000 جنيه في خزينة جمرك السيارات بمطار القاهرة، واللي حضرتك ممكن تسترده بسهولة بعد انتهاء جلسة المزاد، ومن هنا بيتم بس خصم مبلغ التأمين المدفوع من قيمة السيارة في حال رسى المزاد على المشتري.
كمان لازم تسدد 30% كحد أدنى من قيمة السيارة بعد ما المزاد يرسى عليك، أما طرق السداد، فممكن تكون كاش أو عن طريقة انستا باي، أو أي وسيلة دفع إلكتروني.
بس خليك عارف، إنك لازم تسدد 70% من قيمة المبالغ المستحقة بعد أسبوعين من انتهاء المزاد، لأن ممكن جدا يتم فرض رسوم تخزين بنسبة 1% من قيمة المزاد عن كل يوم تأخير في سداد قيمة السيارة، ولمدة أسبوع كحد أقصى.
طب التسليم بيكون إمته؟
بيتم تسليم اللوط المباع بعد أسبوع لمصلحة الجمارك وهيئة الخدمات الحكومية، مع خصم قيمة المصروفات والغرامات، وبيرجع الباقي من مبلغ التأمين المؤقت.
عشان كده، المزاد ده بيعتبر فرصة للمستثمرين والمشترين المهتمين بشراء عربيات جودتها عالية ومن ماركات معروفة وكمان بأسعار تنافسية.
وفي الفترة الأخيرة، مصلحة الجمارك انتهت من بيع 17 سيارة ومواتير في مزاد علني، وده حصل ضمن واردات المركبات المخزنة بجمارك السيارات بمطار القاهرة الدولي.
والمزاد ده، شهد بيع سيارات من ماركات شهيرة مثل "نيسان، BMW، تويوتا، رانج روفر، هيونداي، مرسيدس، دودج، وكرايسلر".
