بعد رأس الحكمة وصفقة بن سلمان.. مفاجأة في الاستثمارات القطرية في مصر
هو صحيح الاستثمارات القطرية اتاخرت في الوصول لمصر وايه حجم الاستثمارات القطرية في السوق المصري.. وايه المفاجأة اللي جاية في الطريق بعد صفقة رأس الحكمة الاماراتية والاستثمارات السعودية الأخيرة.. كل التفاصيل في التقرير ده خليكم معانا للآخر
مصر والخليج طول عمرهم سند لبعض في الشدة والرخاء ومواقف مصر مع دول الخليج نابع من مسؤولياتها التاريخية تجاه أشقائها العرب ومصر بتكون حاضرة في الصفوف الاولي عند اي خطر يهدد الخليج العربي ودي سياسة لخصها الرئيس السيسي في جملة واحدة وهي مسافة السكة والخليج الحقيقة كان ضهر وسند لمصر في أزماتها الاقتصادية لأن قوة مصر من قوة العرب كلهم لكن التعاون والدعم الاقتصادي والمالي دا خد شكل مختلف تماما بيعتمد على تحقيق المصلحة لمصر ودول الخليج عن طريق تحويل اي دعم مالي إلى استثمارات في السوق المصري وبكده الخليج يستثمر جزء من الفوائض المالية عنده في مصر ودا بيحقق اكتر من هدف في نفس الوقت أهمها تعميق التعاون العربي وتاني حاجة الاستثمارات العربية المشتركة بتزيد من قوة كل العرب وتالت حاجة أن السوق المصري بمعايير الاستثمار من أفضل الأسواق العالمية دلوقتي ودا معناه اي دولار هيضخه الخليج في مصر هياخد قصاده دولار مكسب.
عشان كل اللي قلناه دا الخليج بدأ ضخ مليارات الدولارات كاستثمارات في السوق المصري والإمارات خدت الخطوة الأولى بصفقة رأس الحكمة الضخمة واللي كانت فاتحة الخير على السوق المصري وحلت مشاكل كتير في مصر أولها أزمة السوق السوداء ونقص العملة الأجنبية ودا لأن الامارات ضخت 35 مليار في السوق المصري وبيوصل حجم الاستثمارات النهائية للصفقة 150 مليار دولار هتضخ على مدار فترة تنفيذ المشروع وبعدها الامارات موقفتش عند صفقة رأس الحكمة ووقعت إتفاقية لإنشاء منطقة صناعية في مصر ودا غير ضخ مليارات الدولارات تاني في مشروعات الطاقة النظيفة في الصعيد
بعد الامارات دخلت المملكة العربية السعودية على خط الاستثمار واعلنت عن ضخ 5 مليار دولار استثمارات عاجلة في مصر بأمر مباشر من الأمير محمد بن سلمان ولي العهد ووس ماكانت صفقة رأس الحكمة بتعليمات مباشره من الشيخ محمد بن زايد ودي بيفسر مدى عمق العلاقات الخليجية المصرية والسعودية أعلنت كمان إن ال5 مليار دولار دي هتكون مرحلة أولي ولسه فيه استثمارات ضخمة هيتم الإعلان عنها خلال زيارة بن سلمان المرتقبة لمصر في الأيام الجاية.
الاستثمارات الإماراتية السعوديه في مصر فتحت باب السؤال عن مصير الاستثمارات القطرية الجديدة في مصر وسر تأخرها خاصة أنه كان فيه تصريحات قوية من مسؤولين قطريين بضخ أموال ضخمة في مصر واتقال وقتها أن التأخير دا بسبب رغبة قطر في الاستحواذ على حصص اغلبية في الشركات المطروحة ضمن برنامج الطروحات الحكومية وبالرجوع للأرقام هنعرف أن الكلام ده مش حقيقي لان الاستثمارات القطرية في مصر موجودة من زمان ووصلت حسب وزير التجارة والصناعة القطري محمد بن حمد بن قاسم آل ثاني 5.5 مليار دولار وقال كمان إن مصر من أكبر الدول اللي قطر بتستثمر فيها .
ولو فاكرين مجموعة العرجاني جروب المصرية وشركة الديار القطرية للاستثمار العقاري، أعلنوا من قريب عن توقيع عقد شراكة استراتيجي لتنفيذ مشروع بالتجمع الخامس بالقاهرة الجديدة بتكلفة إجمالية تصل الى 12 مليار دولار ودا رقم ضخم جدا في عالم الاستثمارات .
طيب ايه الجديد في ملف الاستثمارات القطرية في مصر ؟
شوف حضرتك الاستثمار القطري جاي جاي بقوة ولو فاكرين في سبتمبر الحالي استقبل الفريق كامل الوزير وزير الصناعة والنقل، المهندس جاسم بن سيف السليطي، وزير المواصلات القطرى ومعاه وفد اقتصادي رفيع المستوى وكان محور اللقاء زيادة حجم الاستثمارات القطرية فى مصر وخاصة فى مجال الصناعة ودعم تطوير العلاقات الاقتصادية والتجارية فى مجال الموانئ والمحطات المتخصصة، ومشاركة الجانب القطرى فى تطوير محطات الحاويات الحالية بالموانئ المصرية عن طريق ضخ استثمارات مباشرة لتطوير ورفع كفاءة البنية الفوقية ومعدات التشغيل وتطبيق أحدث نظم التكنولوجيا فى الإدارة والتشغيل.. واتفق الوزير مع الضيف القطري على تكثيف اللقاءات بين الجانبين خلال الفترة القادمة لاستعراض وتحديد الفرص الاستثمارية بقطاعى النقل والصناعة والتى ممن الممكن أن تشكل انطلاقة كبيرة بين الجانبين للتعاون المشترك فى هذين المجالين.
