بعد الارتفاعات الجنونية وصرخة التجار.. امتى عقدة سوق السيارات هتتحل

سوق العربيات في مصر واحدة من اهم الأزمات اللي للاسف لحد اللحظة دي الحكومة مش قادرة تسيطر عليها والأسعار فيه مرتبطة بالعرض والطلب واليات السوق.. ياتري هل الحكومة عندها خطة للسيطرة علي سوق العربيات في مصر.. واية الحلول المطروحة للسيطرة علي الارتفاعات الكبيرة في اسعار العربيات بالأسواق.. وايه اللي طلبه التجار من الحكومة.. خليكم معانا للآخر وهتعرفوا التفاصيل 
 

سوق العربيات في مصر من فترات طويلة وهو خارج السيطرة، وبتدخل فيه حاجات كتيرة بتأثر علي الأسعار، خصوصا أن جزء كبير من العربيات الجديدة بتكون استيراد، وبالتالي اسعار العربيات بقت خارج السيطرة، وارتفاع اسعار العربيات الجديدة اثر كمان علي اسعار العربيات المستعملة خصوصا أن بقي في طلب كبير من الناس عليها وبالتالي التجار رفعوا اسعارها بارقام كبيرة ورجع الأوفر برايس من تاني.

طيب هل الحكومة عندها خطة حقيقية للسيطرة علي سوق العربيات في مصر؟
الحكومة مؤخرا بدأت تستهدف السيطرة علي سوق السيارات في مصر، وحطت خطة لتطوير صناعة السيارات علشان يتم تصنيعها عندنا هنا في مصر، وفعلا الحكومة وقعت أكثر من اتفاقية مع شركات عالمية رائدة في مجال صناعة العربيات لتعزيز التصنيع المحلي من النوع ده من الصناعات .

الدكتور مصطفي مدبولي، رئيس مجلس الوزراء عقد في الايام الأخيرة اجتماعًا لبحث المعايير والضوابط النوعية لتنظيم سوق السيارات في مصر، وأكد علي ضرورة العمل على وضع معايير واضحة لمنظومة السيارات ويتم الإعلان عنها علشان يحصل ضبط لسوق السيارات وحماية المستهلكين.
رئيس الوزراء في الإجتماع أكد على أهمية أن يكون الجزء الأكبر من الاستيراد مرتبط بالاستيراد للوكلاء اللي عندهم مراكز صيانة في مصر واللي عندهم مصانع لتجميع السيارات، ووجه بعقد اجتماع مع مسئولي قطاع السيارات وممثليه، لمناقشة المعايير اللي يمكن وضعها لتحقيق مستهدفات الدولة  من قطاعات صناعة العربيات.
اجتماع رئيس مجلس الوزراء ناقش كمان الخطوات اللي الحكومة هتتخذها لتوطين وتعميق التصنيع المحلي للسيارات، وخصوصا العربيات الكهربائية بما يشمل تقديم حوافز لجذب الشركات العالمية للعمل بالسوق المصرية خصوصا في ظل اتجاه الدولة لتشجيع الصناعة المحلية بشكل عام وصناعة العربيات بشكل خاص .
اجتماع رئيس مجلس الوزراء تناول كمان معايير استيراد السياراات المجهزة لذوي الهمم بما يضمن وصول الدعم المخصص لهم للمستحقين وتنتهي ظاهرة التربح من العربيات المخصصة لذوي الهمم والأحتياجات الخاصة .
الجديد في الأزمة أن شعبة السيارات والتجار بعتوا يستعجلوا الحكومة لاتخاذ إجراءات سريعة لضبط السوق والسماح بالاستيراد بشكل كامل بالتزامن مع أي تعديلات الحكومة عاوزة تعملها يعني التجار قالوا للحكومة افتحوا الاستيراد الاول وبعدين نشوف اي تعديلات لأن السوق بيعاني من نقص شديد في المعروض ودا اللي سبب رفع الأسعار بالشكل ده.
طيب اية اللي يخلي مصر تفكر في زيادة التصنيع المحلي من السيارات ؟.
طبعا كلنا عارفين الصراعات الموجودة حاليا في اغلب دول العالم واللي طبعا اثرت علي كل الدول وطبعا الانتاج العالمي تاثر بالصراعات دي، وواحدة من اهم الصناعات اللي تاثرت حاليا هيا صناعة السيارات خصوصا في دولة الاتحاد الأوروبي واللي متاثرة بدرجة كبيرة بتداعيات الحرب الروسية الأوكرانية، وتناقص انتاج السيارات في دول الاتحاد الأوروبي هيدي فرصة للمنتج المصري علشان يدخل ويكون قادر علي تلبيه الطلب في السوق المصري وكمان التصدير للخارج وده طبعا هيكون له دور كبير في تخفيض فاتورة استيراد السيارات واللي بتوصل سنويا لـ 4 مليار دولار سنويًا.