كلمة السيسي منزلتش الأرض..إزاي مصر دخلت عصر الاستثمارات المليارية
فاكرين لما السيسي قال مصر هتبقي قد الدنيا وبكرة تشوفوا مصر وفاكرين لما قال بردو إن مصر كانت شبه دولة وهترجع دولة كبيرة.. ليه بنفكركم بكلام الرئيس النهاردة وايه علاقة اللي قاله بالصفقات الضخمة في عالم الاستثمارات.. تابعونا وهتعرفوا التفاصيل في الفيديو ده
لو سألت اي سياسي مخضرم من حوالي 11 سنة أن مصر هتكون قبلة الاستثمار العالمي كان هيفتكرك مجنون لأن المشهد وقتها كان بيقول البلد دي مش هتقوم ولو بعد 50 سنة بسبب الفوضى والعنف والمؤامرات اللي حاصرتها بعد سقوط حكم جماعة الشر وكانت البلد حرفياً على شفا الإفلاس الاقتصادي مع توقف اغلب الأنشطة الاقتصادية وفي مقدمتها الاستثمار وتدهور البنية التحتية وغياب الأمن والاستقرار الأب الشرعي لاي تنمية لكن السيسي قالها أن مصر هتبقي قد الدنيا بمعناها الواسع وفعلا حقق اللي وعد بيه .
السيسي أقام اكبر وأحدث وأضخم بنية أساسية في تاريخ مصر الحديث والقديم وعمل مشروعات في كل المجالات عدت تكلفتها ال10 تريليون جنيه وبنى الطرق والمحاور والكبارى والموانئ والمناطق اللوجستية ومحاور التجارة مع الدول التانية وقناة سويس جديدة ومحطات كهرباء ومياه وبنية أساسية رقمية وكل ده مقومات طبيعية لاي تنمية واي استثمارات وحقق قبلها الأمن والاستقرار والنتيجة رجعت البلد تنور تاني في قطاعات الاقتصاد واحتلت مصر المركز الأول في جذب الاستثمارات الأجنبية في افريقيا وواحدة من الدول الواعدة عالمياً في قطاع الاستثمارات الخارجية.
بوابة الاستثمارات فتحت ب150 مليار دولار هي إجمالي الاستثمارات النهائية في راس الحكمة على البحر المتوسط مع إكتمال المشروع وبعدها الحكومة بتستعد لإعلان صفقة مماثلة لمنطقة رأس بناس على البحر الأحمر وهي صفقة ممكن تعدي استثماراتها ارقام صفقة رأس الحكمة حسب رأي الخبراء واللي شايفين أنها هتكون واحدة من أهم الاستثمارات في العالم وهيتم الإعلان عنها خلال الفترة الجاية ولسه فيه صفقة رأس جميلة على شواطئ سيناء الفيروزية واللي هتكون صفقة بردو من العيار التقيل وضيف علي دا كله صفقات المنطقة الاقتصادية لقناه السويس واللي كل يوم بيتم الاعلان عن صفقات فيها بمليارات الدولارات وغير المشروعات في قطاعات الصناعة والزراعة والطاقة النظيفة ومس عاوزين ننسي المناطق الصناعية الجديدة سواء اللي هتعملها الصين أو الامارات او تركيا.
كل اللي قلناه ده مجرد بداية في بلد قدرت تحقق المعجزة وتبني أحدث بنية أساسية في العالم ورئيس عارف هو بيعمل إيه وكان بيقرأ من كتاب المستقبل وعارف أن نهضة الدول مش بتقوم غير بالتخطيط العلمي الصحيح وكلنا فاكرين لما منصات أهل الشر طلعت واتريقت على مشروعات السيسي في الطرق والكباري وهي نفس المشروعات اللي فتحت الطريق لمليارات الدولارات والاستثمارات والتنمية.
