الدولار يرتفع في الدقيقة 90 بعد أطول موجة هبوط.. والمال السعودي يقلب موازين الاستثمار في مصر.. ومصير خطة تخفيف الأحمال.. وتطور خطير في ملفي الغاز والسيارات
إيه اللي حصل في مصر في الساغات اللي فاتت وليه الدولار صدم الجنيه في اليوم الاخير للتداولات وإيه الحدث الأهم في الاسبوع اللي فات.. خليكم معانا وهنشوف كل التفاصيل
الحقيقة الاسبوع دا كان مليء بالاحداث والقرارات المالية والاقتصادية واسعار العملات واسواق الدهب.. وانتهى الاسبوع بارتفاع مفاجيء للدولار أمام جنيه بعد سلسلة طويلة من الانخفاضات استمرت أكتر من أسبوعين ورجع الدولار يزيد وارتفع بحوالي 10 قروش وسجل متوسط 48.43 جنيه في عدد من البنوك.
ملف الاستثمارات العربية في مصر شهد هو كمان تطور كبير وخاصة مع الاعلان عن استثمارات سعودية جديدة في الطريق تتراوح ما بين 15 و20 مليار دولار بعدما قررت السعودية تدخل بتقلها في السوق المصري وقبل كده عملت خطوة مهمة جدا وهي تحويل الودائع السعودية في البنك المركزي المصري واللي بتوصل 10 مليار دولار الي استثمارات في السوق المصري .
وحسب المعلومات السعودية هتستثمر المبالغ دي في عقد صفقات استثمارية ضخمة بالفعل والصفقات دي بتشمل الاستحواذ على بعض الشركات المصرية بخلاف تنفيذ مشروعات استثمارية كبرى.
ملف الغاز المصري كان محور الاحداث في الايام اللي فاتت ودا بعد زيارة وزير البترول والثروة المعدنية المصري لإيطاليا وهي شريك مهم لمصر في حوض المتوسط وكمان إيطاليا فيها شركة ايني العملاقة في قطاع البترول والغاز واللي اكتشفت حقل ظهر بالبحر المتوسط.
وسلط التقرير الضوء على اتفاق الوزير مع قادة شركة ايني على التعجيل في تنفيذ أعمال التنمية بحقل ظهر، وسرعة إنجاز بحفر 3 آبار جديدة بداية من الأسبوع الجاي، وربطهم على الإنتاج ودا مقابل التزام الحكومة بسداد المستحقات الشهرية بانتظام من حصة الشريك وبخلاف دفع المديونيات المتأخرة وفقاً للجدولة المتفق عليها.
وفي قطاع البنوك كان الحدث الأهم وهو قرار البنك الأهلي المصري وبنك مصر بزيادة حدود الصرف على بطاقات الائتمان الخاص بالعملة الأجنبية من 4 آلاف دولار على أقصى بطاقة ائتمانية إلى 6 آلاف دولار في الشهر مع السماح لعميل البنك المسافر إلى الخارج بشراء 5 آلاف دولار نقدًا من البنك كل شهر ومش مرة واحدة في السنة.
محمد الأتربي، رئيس مجلس إدارة بنك مصر ورئيس اتحاد بنوك مصر، قال إن كل عميل دلوقتي يقدر يروح البنك ويشتري 5 آلاف دولار بحد أقصى، بعد إظهار ما يثبت أنه مسافر للخارج، إضافة إن لو معاه بطاقة ائتمانية يقدر يصرف بيها لحد 6 آلاف دولار، حسب درجة البطاقة.
وفي قطاع السيارات كان الخبر الأهم بعد قرار البنك المركزي المصري بالسماح للبنوك بتدبير الدولار لتمويل طلبات العملاء المعلقة لاستيراد السيارات، بعد وجود انفراجة من النقد الأجنبي، لأول مرة من سنتين ودا حسب تصريحات صحفية لمصادر مصرفية.
وحسب المعلومات اللي جاية من البنوك أنه وصلتهم تعليمات من المركزي بتدبير الدولار للعملاء لاستيراد السيارات ووسائل الركوب والنقل وانه تمت مخاطبة العملاء للإيداع في حساباتهم الجنيه المصري ما يعادل تدبير البنك للعملة لاستيراد طلباتهم المعلقة من السيارات..
أخر حاجة شغلت المصريين في الايام الاخيرة كان مصير خطة وقف تخفيف الأحمال واللي هتنتهي مدتها بعد 48 ساعة وتحديدا يوم الاحد اللي جاي بعد قرار الحكومة بوقف قطع الكهرباء في الفترة من 21 يوليو اللي فات ولغاية 15 من سبتمبر الحالي.
ولغاية اللحظة دي مجلس الوزراء ماصدرش اي قرار رسمي سواء بعودة تخفيف الاحمال وقطع الكهرباء لمدة ساعتين أو استمرار وقف خطة تخفيف الأحمال وتوفير المواد البترولية اللي محطات توليد الكهرباء عايزاها علشان تفضل شغالة ومتقفش عن التشغيل .
مصادر بوزارة الكهرباء والطاقة المتجددة، قالت لبانكير أن مركز التحكم القومي للكهرباء ما اصدرش اي قرارات رسمية سواء بالعودة لتطبيق خطة تخفيف الاحمال.
وأضاف التقرير إن المصادر أكدت إن الاقرب للعمل في الخطة الجديدة هو استمرار وقف العمل بخطة تخفيف الأحمال خصوصا في ظل الجهود اللي بتقوم بيها الحكومة لتوفير المواد البترولية اللي بتحتاجها محطات توليد الكهرباء سواء غاز طبييعي او مازوت.
