الاستيراد فتح والسعر هيوقع.. قرار جديد من المركزي يعيد الحياة لسوق السيارات

 
ايه اللي بيحصل في سوق السيارات دلوقتي وايه حكاية قرار المركزي المصري الجديد واللي هيقلب موازين السوق وينزل الأسعار.. لو مهتم وبتفكر تشتري سيارة زيرو شوف الفيديو ده للآخر .

 
كلنا عارفين إن سوق السيارات ليه فترة طويلة فيه مشكلة كبيرة وهي نقص المعروض مقابل الطلب بسبب قيود الاستيراد على مدار السنتين اللي فاتوا ودا عشان الحكومة حطت السيارات في خانة السلع الترفيهية ضمن 12 سلعة تانية ووقفت استيرادها لتوفير الدولار و قف نزيف العملة في ذروة الأزمة وحصلت انفراجة مؤقتة بعد قرار التعويم وصفقة رأس الحكمة لكن رجعت الأزمة من جديد بسبب ان السوق عطشان بالبلدي كدا بسبب طول مدة وقف الاستيراد وارتفاع الأسعار لارقام قياسية بالأوفر برايس ودا خلي الطلب يقل بشكل كبير جدا وقتها بخلاف أزمة سيارات المعاقين الأخيرة واللي رجعت حظر استيراد السيارات مؤقتا

طيب ايه الجديد في أزمة السيارات ؟
شوف ياسيدي زي ماقلنا من حوالي شهر كده البنك المركزي خاطب البنوك لحصر حجم الاعتمادات المستندية لتمويل 13 سلعة غير أساسية واللي كان موقوف تمويلها إلا بعد موافقة المركزي للبنوك على تدبير الدولار للعملاء لاستيراد كل السلع الترفيهية اللي كان محظور استيرادها باستثناء السيارات ودا خلق حالة فوضى واضطراب في السوق ورجعت الأسعار تزيد من تاني واستمرت الأزمة لغاية النهاردة لكن حصلت في الساعات الأخيرة مفاجأة هتقلب موازين السوق ودا بعد قرار البنك المركزي المصري بالسماح للبنوك بتدبير الدولار لتمويل طلبات العملاء المعلقة لاستيراد السيارات، بعد وجود انفراجة من النقد الأجنبي، لأول مرة من سنتين ودا حسب تصريحات مصادر مصرفية لموقع مصراوي من شوية .

طبعا من ساعة انتشار خبر قرار المركزي وسادت حالة من التفاؤل في سوق السيارات زيرو ومستعمل عشان اكيد هتحصل انفراجة كبيرة والعجلة هترجع تشتغل تاني والاسعار هتنزل نتيجة زيادة المعروض المنتظر مع استىناف عمليات الاستيراد واكيد المستوردين عندهم رغبة كبيرة في استيراد اعداد كبيرة من السيارات عشان يعوضوا فترة توقفهم الطويل وكمان قرار زي دا هيرجع آلاف الورش ومحلات قطع الغيار للعمل مرة تانية ودا غير أن أسعار السيارات الزيرو لما هتنزل بالتالي أسعار السيارات المستعمله هتنزل الارض وناس كتير هتقدر تشتري عربية توفر عليها زحمة المواصلات.

وحسب المعلومات اللي جاية من البنوك  أنه وصلتهم تعليمات من المركزي بتدبير كالدولار للعملاء لاستيراد السيارات ووسائل الركوب والنقل وانه تمت مخاطبة العملاء للإيداع في حساباتهم الجنيه المصري ما يعادل تدبير البنك للعملة لاستيراد طلباتهم المعلقة من السيارات..

بعيدا عن قرار البنك المركزي باستئناف استيراد السيارات الحكومة في الناحية التانية وتحديدا وزارة الصناعة شغالة على خطط طموحة في ملف توطين صناعة السيارات وجذب كبر ى الشركات العالمية للتصنيع في مصر وشفنا ثمار الجهود دي بإعلان شركات سيارات عالمية للتصنيع في مصر ودا حل طويل الأجل لقطاع السيارات في مصر واللي بيهدف لتحقيق الاكتفاء الذاتي السوق المحلي مع التصدير كمان.