سر زيارة وزير البترول لإيطاليا .. ياترى في اكتشافات جديدة جاية في السكة

إيه سر زيارة وزير البترول الأخيرة لإيطاليا وخاصة لشركة "إيني" اللي شغاله في أغلب حقول مصر، هل هي مرتبطة باتفاقيات جديدة بخصوص اكتشافات بترولية هتغير خريطة الإنتاج في مصر وتعمل انتعاشة للاقتصاد، ولا زيارة بروتوكولية عادية، هنقولك كل التفاصيل في التقرير التالي.
 

في الساعات الأخيرة، وزير البترول والثروة المعدنية المهندس كريم بدوي، زار إيطاليا؛ وعمل جلسة مباحثات مع مسئولي شركة "إيني" اللي هي متخصصة في أعمال حفر آبار البترول والغاز وخلافه، والوزير اتفق مع الشركة على بدء عمل 3 حفارات لشركة "عجيبة" للبترول في شهر سبتمبر الحالي، عشان معدلات الإنتاج ترجع لمستوياتها الطبيعية.

كمان الزيارة دي أكدت على أهمية الشراكة الاستراتيجية القائمة بين مصر وشركة "إيني"، وإن الحكومة دلوقتي بتسعي لجذب المزيد من الاستثمارات في قطاع الطاقة، عشان تقدر تحقق التنمية الاقتصادية وكمان تأمن إمدادات مصادر الطاقة في المنطقة، وده طبعًا لأن مصر مركز إقليمي للطاقة في الشرق الأوسط.

"الوزير" عمل اجتماع موسع مع الرئيس التنفيذي لشركة إيني الإيطالية كلاوديو ديسكالزي، وكمان عمل زيارة ميدانية لقسم الأبحاث والمعامل الإلكترونية، والتقى مع فريق عمل الطاقة الجديدة والوقود الحيوي والتقاط وتخزين الكربون والحفاظ على الأصول، وفي الاجتماعات دي أكد لهم إن الحكومة المصرية حريصة جدًا على دعم التعاون مع شركة "إيني"، وإنه بيتطلع لتعاون مستقبلي عشان يقدروا يحققوا نجاحات كبيرة في القطاع في الفترة الجاية، باعتبار إيطاليا أو شركاتها "شركاء نجاح" في قطاع البترول المصري.

ومن هنا، مسئولي الشركات أكدوا اعتزازهم بالشراكة الاستراتيجية مع مصر، وأشادوا كمان بالتطورات الإيجابية في قطاع البترول المصري، وإن الحكومة بتسعى دلوقتي لتوفير بيئة استثمارية محفزة، وكمان أكدوا حرص شركة "إيني" على تعزيز وجودها في السوق المصرية وتحقيق فرص استثمارية كتيرة.

وشركة "إيني" أكدت كمان أن مهم جدًا الاستفادة من التكنولوجيا الحديثة في تحسين إنتاجية الآبار البترولية، وشددت على ضرورة اعتماد الطريقة دي في مصر بشكل مكثف في الفترة اللي جاية، عشان تقدر تحقق الإنتاجية المرغوبة من الحقول البترولية وكمان تحقق فائض كويس يسد في وقت الأزمات أو ممكن مصر تصدره للخارج.

ونقدر نقول إن شركة "إيني" من أهم شركات البترول الأجنبية اللي شغالة في مصر، وهي المسؤولة عن اكتشاف حقل ظُهر في البحر المتوسط سنة 2015، وهو أحد أكبر حقول الغاز في منطقة شرق المتوسط، وحاليًا الشركة بتستعد لاستثمار حوالي 8 مليار دولار في مصر خلال 4 سنين جاية، وده هيبقي في مجال البحث واستكشاف البترول والغاز من حقول الصحراء الشرقية وغيرها من الحقول الموجودة في مصر.

وده في الوقت اللي بتسعى فيه الحكومة المصرية ل زيادة قدراتها في إنتاج الغاز  والبترول عشان الاستهلاك المحلي ارتفع بمعدلات كبيرة، وكمان الحكومة بتستهدف إن مصر تبقى مركز إمداد إقليميا للغاز، خاصة بعد اكتشافها "حقل ظهر"، اللي فتح شهية المستثمرين للعمل في قطاع الغاز المصري، وساعد البلاد على تصدير كميات كبيرة من الغاز المسال.

ومن فترة، أعلنت "إيني" أنها بدأت الإنتاج من آبار النفط والغاز اللي اكتشفتها حديثاً في امتياز مليحة بالصحراء الغربية في مصر، بقدرة إنتاجية تبلغ 8500 برميل، ودي كانت نقطة إيجابية في سجلها، ودفعت دفع الحكومة المصرية إنها تعزز التعاون معاها، وإن وزير البترول يتفق مع الشركة على بدء أعمال جديدة هترفع الإنتاجية من وسائل الطاقة خلال الفترة الجاية وهتساهم في دعم الاقتصاد المصري بطريقة مباشرة.