هتوفر 30%.. خبر سعيد من الحكومة لأولياء الأمور قبل بدء العام الدارسي

 
خلاص داخلين علي موسم جديد للدراسة كل عام وحضراتكم بخير، والدولة برضوا قدمت مفاجاة لأولياء الأمور علشان تخفيف المعاناة.. ياتري اية هيا المفاجاة دي وازاي هتخفف الأعباء علي أولياء الامور.

في عز ما الدولة كانت بتمر بضيقة مالية ومفيش فلوس في البلد والبلد بتعاني من ازمات مالية ملهاش أول من آخر، القيادة السياسية بتوجهه الحكومة بتجهيز حزم حماية اجتماعية للمواطنين لزيادة الاجور والمعاشات علشان تخفف معاناة الازمة الاقتصادية اللي بيمر بيها وطبعا مصر واحدة من الدول اللي بتتأثر بالأحداث العالمية دي، وبيكون القرار لتخفيف معاناة المواطنين.
طيب اية هيا المفاجاة اللي بتجهزها الحكومة للمواطنين قبل بدء العام الدراسي؟.
وفي عز ما الدولة كانت بتعاني، الحكومة وجهت وزارة التموين بعمل معارض لبيع السلع للمواطنين باسعار مخفضة، وحاليا الدولة برضوا قررت تقف جنب المواطن المصري وهتبدأ النهاردة تفتح معرض اهلا مدارس لبيع المستلزمات الدراسية اللي هيحتاجها الطلاب باسعار مخفضة وده ضمن واحد من جهود الدولة لتحفيف المعاناة علي المواطنين واللي بتوصل فيه التحفيضات علي المعروضات لـ30% علي الاسعار الموجودة في السوق.
طيب معارض أهلا مدراس دي هتكون موجود فين في المحافظات؟.
وزارة التموين والتجارة الدخلية قالت أنه هيتم تجهيز معارض في كل محافظات الجمهورية وبحد أدني معرض رئيسي في عاصمة كل محافظة ده غير المعارض الفرعية بالقرى والمراكز اللي تابعة للمحافظات، والمعارض دي هتقدم  كل المنتجات الخاصة بالمدارس بالإضافة للمنتجات الغذائية بأسعار أقل عن غيرها في الأسواق التانية وبيستهدف تخفيف العبء عن الأسرة المصرية.

علاء فاروق وزير التموين والتجارة الداخلية قال أنه هيكون زيارات يومية ومتابعة لعمل المعارض ونسب التخفيضات الموجودة فيه للتأكد من تقديم نسب خصومات للمواطنين، خصوصا أن العارضين حصلوا على امتيازات للتواجد بالمعارض اهمها أماكن للعرض بأسعار رمزية .
طيب اية الحاجات اللي هتبيعها المعارض دي للمواطنين ؟..
معارض أهلا مدارس هتقدم كل الخدمات المتاحة لأولياء الامور، وهتوفر كل المستلزمات والأدوات المدرسية من ملابس وأحذية وشنط مدرسية وزى مدرسي وكشاكيل وكراسات وأقلام وكل ما يلزم من أدوات بأسعار مخفضة للمواطن الصمرين بالأضافة إلي انها هتوفر كمان السلع الغذائية الأساسية بأسعار مخفضة وهتوفر كمان الأدوات الإلكترونية.
وزارة التموين والتجارة الداخلية أعلنت كمان عن مشاركة الهيئة القومية للبريد لتقديم خدماتها للمواطنين علشان توصل الطلبات للمواطنين اللي مش عايزين ينزلوا المعارض ويطلبو الحاجة اللي محتاجينها دليفري ودي هتكون بخصموات هتوصل لـ50% من اسعار التوصيل، بالإضافة لمشاركة بعض شركات المحمول ومشاركة شركات الحلول المالية، وهيكون في تخصيص لجناح كبير خاص لكل الشركات التابعة للشركة القابضة للصناعات الغذائية علشان تعرض المنتجات التابعة لها

وزارة التموين والتجارة الداخلية قالت كمان، ان هيئة البريد هتشارك كمان في معارض أهلا مدارس لتقديم عروض لفتح حسابات توفير للطلاب واولياء امورهم، وكمان شركات الاتصالات والبنوك، هيقدموا عروض للطلاب علي كافة المستويات .