زي ماقال بانكير.. الدولار في النازل ودا سر قوة الجنيه

 

الدولار في النازل اليومين دول وبدأ اول تعاملاته في الاسبوع بالهبوط بعد اسبوع كامل من التراجع .. ياترى ليه الدولار نازل وايه سر قوة الجنيه في الأيام الأخيرة وهل هيستمر التراجع في الأسعار.. خليكم معانا للآخر وهتعرفوا كل التفاصيل..
 

 
سعر الدولار عرض وطلب من مارس اللي فات ومحدش بيتدخل في سعره لغاية دلوقتى يعني سعره اللي في السوق هو سعره الحقيقي ونزول وصعود الدولار أمر طبيعي ومفيش قلق منه ودا اللي اسمه سعر الصرف الحر أو المرن اللي طبقه البنك المركزي المصري بعد سنين من التحكم الحكومي في سعر الجنيه.
لو فاكرين يوم الخميس اللي فات قلنا هنا في بانكير إن الدولار  إحتمال كبير يكمل في طريق النزول ودا بسبب تحسن المؤشرات الاقتصادية والمالية بشكل عام والتوقعات الدولية للاقتصاد المصري يعني الحكاية كلها مرتبطة ببعضها ومرهونة بتوافر المعروض الدولاري والطلب عليه من السوق وقلنا إن مصر بتجري في طريق التنمية وعرفت كمان طريق الصناعة والتجارة والتعهيد والمواني والتصدير والاستثمارات الضخمة وقدرت تنزل التضخم وتعبر من أصعب أزمة عملة وفي وقت كل موارد الدولار رجعت تسترد عافيتها اكتر من الاول والأهم بقي أن بقي فيه خطة واضحة قدام الحكومة لتوفير العملة الصعبة وبارقام كبيرة عشان تضمن تحركات سوق الصرف .

اللي حصل في معركة الجنيه والدولار يستحق كل إشادة لمسؤولي البنك المركزي المصري واللي قدرو يتعاملوا مع كل الأزمات بقوة واحترافية ولغاية ما شفنا الدولار بيرجع على مدار أيام طويلة قدام الجنيه ودا مجاش من فراغ لكن كان وراه شغل كبير جدا وصلنا في النهاية أن يكون عندنا احتياطي تاريخي في البنك المركزي وإن التدفقات الاستثمارية تسجل ارقام محصلتش في تاريخ مصر كله ووصلتنا بردوا إن مصر بقت توطن صناعة السيارات الحديثة وصناعة الرقائق الإلكترونية واصعب الصناعات في كل المجالات و صلنا لارقام جديدة في التصدير ولسه بقية خطط التطوير لما تخلص هتشوفوا مصر حاجة تانية خاصة في منطقة قناة السويس وفي قطاعات السياحة والبترول والغاز والدهب والطاقة الشمسية وطاقة الهيدروجين.

كل اللي قلناه دا سبب طبيعي لارتفاع أسعار الجنيه من تاني قدام الدولار وبيعكس حقيقة تعافي الاقتصاد المصري واللي العالم كله بدأ يتكلم عنه بداية من صندوق النقد الدولي لغاية المؤسسات والبنوك الإقليمية ودا يخلينا نقول زي ما قلنا قبل كده إن الأيام الجاية هي ايام الجنيه واللي بقي قوي بنفسه ومن غير حماية ولا ألاعيب في سوق الصرف.
طيب قوة الجنيه هتنعكس ازاي عليّ الأسواق ؟
أكيد طبعا لما تكون عملتك قوية يبقي القوة الشرائية هترجع اقوي والجنيه هيسترد قوته اللي فقدها مع بداية أزمة 2022 في أوكرانيا والدولار هيستمر في النزول مادام الطلب عليه قليل وفي نفس الوقت متوفر بكترة في البنوك وكل الخطط اللي شغالة عليها الدولة بتقول إنه هيكون زي اي عملة تانية في السوق والوحش الأمريكي هيفقد هيبته وإن المسألة مش مستحيلة وكلها معادلات اقتصادية تقدر تتحقق لو فيه خطط وإرادة للتنفيذ زي ما بيحصل دلوقتي في مصر.