5 مليار دولار تانية من الإمارات.. العجلة دارت في رأس الحكمة
خلاص عجلة التنمية دارت والمعدات اشتغلت والمليارات هلت.. إيه اللي بيحصل في الساحل الشمالي وتحديدا في منطقة رأس الحكمة وإيه حكاية الاستثمارات الضخمة اللي جاية وصندوق النقد الدولي قال إيه عن المشروع.. كل دا هنعرفه في الفيديو ده خليكم معانا.
مشروع راس الحكمة زي ما احنا عارفين هو مشروع السعد والخير والمليارات ودا لأنه بيمثل أكبر صفقة في تاريخ مصر الحديث واللي بتوصل اجمالي الاستثمارات فيها 150 مليار دولار بانتهاء المشروع العملاق وزي ما احنا عارفين إن الرقم دا هيغير خريطة السياحة والترفيه والتسوق في المنطقة كلها وحوض المتوسط وغير إنه هيوطن كبرى الشركات العالمية المختلفة وأهمية مشروع راس الحكمة الجديد إنه جاي في وقت الدولة نفذت فيه أضخم المشروعات لإحياء الساحل الشمالي وإعادة اكتشافه وبنت العلمين الجديدة واللي بقت حديث العالم ومقصد الملايين دلوقتي كل سنة ومتوقع تكون قبلة السياحة في الشرق الأوسط كله .
طيب ايه الجديد في مشروع رأس الحكمة؟
من ساعات صندوق النقد الدولي أعلن عن توقعات ليه بخصوص المشروع وقال فيها إن عملية تطوير مشروع رأس الحكمة هتبدأ خلال السنة الجاية وإن دا هيتزامن مع ضخ تدفقات دولارية كبيرة وقال كمان إن المشروع هيجذب استثمارات أجنبية بقيمة 5 مليارات دولار في 2025 منها 3.5 مليار دولار واردات رأسمالية بما يؤدى لصافى تدفق من العملات بحوالي 1.5 مليار دولار سنويا، وفسر الصندوق سرعة بداية الأعمال في مشروع رأس الحكمة لأنه معظم البنية التحتية الأساسية موجودة بالفعل فى المنطقة، ومع التدفقات المتوقعة من الدولار رفع صندوق النقد الدولي توقعاته للاحتياطيات الدولية لدى البنك المركزى خلال العام المالى الحالى إلى 47.2 مليار دولار بدعم من إيرادات رأس الحكمة واستثمارات الأجانب فى الأذون والسندات وهو الرقم اللي فعلا المركزي قرب منه لما سجل 46 مليار و400 مليون دولار واحتمال كبير الاحتياطي يعدي توقعات صندوق النقد مع زيادة التدفقات الدولارية من قطاعات تانية.
المفاجأة بقي اللي اعلن عنها الصندوق لما قال إن مرونة سعر الصرف جزء أساسي من الاستجابة المناسبة لتدفقات رأس المال، وفى حالة تدفقات رأس المال، هيتم السماح بارتفاع سعر الجنيه ودا حسب العرض والطلب، بعد إعادة بناء الاحتياطيات يعني الصندوق قال إنه مش عدو للجنيه المصري لكن طبيعي لما الاحتياطي الأجنبي يزيد من العملات في المركزي المصري طبيعي تحصل وفرة والجنيه يرجع يرفع تاني قدام الدولار وبقية العملات التانية.
الخلاصة في الحكاية كلها إن الاستثمار هو مفتاح أي تنمية في أي بلد وتشجيع القطاع الخاص على العمل وانجاز المشاريع وغير كده مش هيكون عندك تدفقات أجنبية ولا صناعة ولا تصدير ولا وفرة في العملة الأجنبية وعشان كده هتفضل رأس الحكمة مشروع مختلف وهيغير شكل الاستثمار في مصر والمنطقة كلها.
