السوداني في مصر.. مليارات الدولارات في انتظار الشركات المصرية

من شوية وصل مصر ضيف من النوع التقيل ومعاه مفاجآت كتير للاقتصاد المصري.. مين الضيف دا وايه الملفات اللي جابها معاه وايه حكاية المشروعات اللي هتنفذها الشركات المصرية بمليارات الدولارات.. خليكم معانا للآخر وهتعرفوا التفاصيل في الفيديو ده.

 
النهاردة الدكتور مصطفى مدبولي استقبل رئيس الوزراء العراقي محمد شياع السوداني بمطار العلمين الدولي  في مستهل زيارته لمصر على رأس وفد رسمي رفيع المستوى واي حد ممكن يفتكر إن دي زيارة عادية من مسؤول عربي كبير لكن الحكاية مش كده خالص لأن الشياع هو أقوى واهم واعلى شخصية في العراق ومش سايب بلده عشان يتفسح في العلمين.. اومال إيه الحكاية والراجل دا جاي ليه؟

شوف ياسيدي لو اخدت بالك من تطور العلاقات المصرية العراقية في عهد الرئيس السيسي هتعرف أن الموضوع كبير اووي وفيه استثمارات بالمليارات وكان فيه اتفاقيات قبل كده إن الشركات المصرية ليها الأولوية في إعادة إعمار العراق بعد الدمار اللي شفته البلاد في صراعاتها الطويلة مع الإرهاب وداعش وغيرها.

العراق دلوقتي دولة غنية جدا وعندها ثروات نفطية ضخمة وكفاية. تعرف انها سددت كل ديونها الخارجية وعندها سيولة دولارية كبير جدا وناوها تستخدمها في إعادة الإعمار والتطوير والانطلاق وشافت إن مصر هي افضل شريك ممكن يساعدها في دا بسبب أن مصر كانت دايما داعم كبير لاستقرار ووحدة العراق ومساعدته في مواجهة شر الإرهاب وكمان لأن الشركات المصرية سمعتها العالمية سبقاها ومتقلش عن أي شركة عالمية سواء في التطوير العقاري والانشاءات أو شركات الكهرباء والصرف الصحي والاتصالات وعشان كده قررت أن مصر هي افضل شريك ليها.

ولو رجعنا للأرقام هتلاقي إن تكلفة إعادة إعمار العراق بتتراوح بين 125و 150 مليار دولار هيكون للشركات المصرية النصيب الأكبر فيها لنفس الأسباب اللي قلنا عليها قبل كده وضيف عليها أن العراق من الناحية التانية بيسعى لاستعادة العمالة المصرية اللي سبق وشالت العراق وقت حربه مع إيران وسمعتها الطيبة هناك وكان فيه ملايين المصريين اللي شغالين قبل أزمة حرب الكويت.
مش بس إعادة الإعمار اللي جاي السوداني يتكلم فيها خلال زيارته العلمين لكن فيه كمان تعاون استراتيجي ضخم تاني بين مصر والعراق وبيضم الاردن كمان وهو خلق خطوط تجارية دولية جديدة تمر بين البلاد التلاتة وصولا للخليج والموانئ البحرية القريبة وهو المعروف باسم الشام الجديد هو اسم لمشروع تعاون عربي يضم الأردن والعراق ومصر، يقوم على أساس التفاهمات الاقتصاديّة والسياسيّة بين البلاد الواقعة في قلب الشرق الأوسط. تم إطلاقه بصيغته الحاليّة في  سبتمبر 2020 بعد سلسلة من الاجتماعات بين قادة الأطراف الثلاثة والمشروعات دي اتقرت خلال القمة الثلاثية اللي جمعت قادة تمصر والأردن والعراق واللي  تم خلالها الإعلان عن حزمة من المشروعات المشتركة بين الدول الثلاث.