هتغير شكل الاقتصاد.. أسرار زيارة الرئيس الفرنسي الاقتصادية لمصر
مصر حاليا عندها زيارة مهمة جدا للرئيس الفرنسي إيمانويل ماكرون، والزيارة دي جاية في وقت مهم جدا.. ياتري اية اهداف مصر الاقتصادية من الزيارة دي.. واية الاتفاقيات اللي هتوقعها مصر خلال الزيارة دي.
من كام ساعة مصر استقبلت ضيف مهم جدا وهو الرئيس الفرنسي إيمانويل ماكرون واللي بيزور مصر، والزيارة دي جاية في وقت حساس جدا علي الصعيد السياسي والاقتصادي، خصوصا أن فرنسا واحدة من الدول الأعضاء في الاتحاد الأوروبي واللي مصر لها علاقات كبيرة معاه وصلت لمستوي الشراكات، وكان اخرها الدعم اللي اقره الاتحاد لمصر بقيمة 4 مليار دولار واللي هيتم صرفهم لمصر خلال الوقت اللي جاي.
الأهمية الكبيرة لزيارة الرئيس الفرنسي لمصر، جانب منها خاص بالجانب الاقتصادي، خصوصا أن مصر حاليا بتعد وجه مفضلة لعدد من كبري الشركات والاستثمارات الفرنسية واللي لهم سابقات أعمال في مصر خصوصا في مجالات النقل والمواصلات بسبب تنفيذهم للخط الأول والثاني لمترو الإنفاق، ده غير أن الشركات الفرنسية هيا المشرفة في الوقت الحالي علي تشغيل الخط الثالث لمترو الإنفاق والقطر الكهربائي الخفيف وعدد تاني كبير من المشروعات الخدمية والاقتصادية في مصر.
طيب اية اللي هيعمله ماكرون خلال زيارته الحالية لمصر؟.
زيارة الرئيس الفرنسي ماكرون هدفها الأول هو تطوير العلاقات الاقتصادية والتجارية بين القاهرة وباريس، وهتفتح آفاق جديدة للتبادل الخبرات وهتكون سبب في زيادة التبادل التجاري بين البلدين، خصوصا أن هيتخللها توقيع عدد كبير من الاتفاقيات في مجالات الطاقة المتجددة والصناعات التحويلية والتكنولوجيا الحديثة وده واحدة من اهم الحاجات اللي الحكومة شغالة عليها في الوقت الحالي لدعم النمو الوطني وتوفير فرص عمل جديدة للمواطنين وزيادة نفاذ الصادرات المصرية لكل دول العالم، وجذب الاستثمارات الأجنبية للسوق المصري.
الزيارة كمان هتكتسب اهمية كبيرة بسبب وجود عدد كبير من الشركات الفرنسية العاملة في مصر واللي بيوصل عددهم لأكثر من 900 شركة فرنسية شغالين في مجالات متعددة وخدمية في السوق المصري خصوصا في مجالات المعدات والأجهزة الكهربائية والسيارات والصناعات الغذائية والصناعات الدوائية ومستحضرات التجميل والصناعات اللوجستية والتوزيع والسياحة والبنوك والبنية التحتية والنقل والطاقة.
زيارة الرئيس الفرنسي للقاهرة هيتخللها كمان المشاركة في مجلس الأعمال الفرنسي المصري واللي هينعقد النهاردة واللي هتشارك فيه عدد كبير من كبرى الشركات الفرنسية والمصرية في اغلب القطاعات والمجالات المهمة للاقتصاد المصري خصوصا في مجالات الطاقات المتجددة والهيدروجين الأخضر، وكمان هيبحث خطوات استفادة الشركات الفرنسية من التسهيلات الكبيرة اللي بتقدمها مصر لدخول الاستثمارات ورؤوس الأموال الأجنبية للسوق المصري، ده غير أن الزيارة كمان هتشهد توقيع عدد كبير من الاتفاقيات الاقتصادية بين البلدين.
الزيارة بتكتسب اهمية كبيرة خصوصا أنها جاية في وقت العالم كله بيشهد تحديات اقتصادية غير مسبوقة بسبب الرسوم الجمركية الأمريكية الجديدة واللي فرضها الرئيس الأمريكي ترامب، والزيارة هتكون سبب في فتح سوق جديد للصادرات المصرية في قارة أوروبا.
