خطة الحكومة لتحويل مصر لمركز عالمي لصناعة الدواء

 
 
مصر في الكام شهر اللي فاتوا فيها أزمة كبيرة في توفير الأدوية.. والحكومة حاليا حطت حل المشكلة دي هدف اساسي عندها.. ياتري الحكومة بتعمل اية علشان تحل أزمة نقص الأدوية في مصر.. وكمية النقص في سوق الأدوية وصلت لكام.

الحكومة الجديدة عندها هدف اساسي ورئيسي وهو توطين الصناعة واستهداف استثمارات جديدة في كل المجالات واحد من المجالات دي هو صناعة الأدوية لتغطية احتياجات السوق المحلية وتقليل الواردات وزيادة الصادرات، وده هيكون هدف اساسي لتقليل الاعتماد على العملة الأجنبية وكمان فتح باب التصدير وزيادة الايرادات من العملة الصعبة المصرية.
طيب الحكومة عملت اية علشان توطن صناعة الدواء في مصر؟.
الدكتور مصطفى مدبولي رئيس مجلس الوزراء، عمل اجتماع مع اللواء بهاء الدين زيدان، رئيس الهيئة المصرية للشراء الموحد والإمداد والتموين الطبي وإدارة التكنولوجيا الطبية؛ علشان يناقشوا توطين صناعة المواد الخام اللازمة للصناعات الطبية خصوصا أن المواد الخام هيا عصب صناعة الدوام، وهيا العامل الاساسي في ارتفاع استهلاك العملة الأجنبية  والتحكم فيها هيقلل الفاتورة الاستيرادية والاعتماد على الصناعات المحلية، وهيزيد من قدرة الدولة على مواجهة التحديات العالمية.
رئيس مجلس الوزراء، قال أن في الفترة اللي جاية هيتم عقد لقاء مع مسئولي كبرى الشركات العالمية، ودعوتهم للاشتراك بالممارسات الخاصة بالشراء المجمع للمواد الخام، وده في أطار رؤية الدولة لعقد شراكات استراتيجية بين القطاع الحكومي والقطاع الخاص، ونقل أحدث التكنولوجيا، وتطبيق أفضل الممارسات العالمية في صناعة المواد الخام الدوائية.
طيب اية اللي هيعمله مجلس الوزراء علشان يوفر الأدوية اللي المواطن المصري محتاجها؟.
حاليا الحكومة بتدرس مشروع التوسع في انتشار صيدليات إسعاف 24 بمختلف المحافظات، وفي الفترة اللي جاية المحافظات هتشهد افتتاحات كتيرة لسلسلة صيدليات لتوفير الأدوية للمواطن المصري وانتهاء ازمة اختفاء الأدوية .
طيب ازاي الدولة هتوفر الأدوية للمواطنين وازاي هتنتهي ازمة نقص الادوية في الصيدليات .

نقابة الصيادلة قالت أن صناعة الدواء والأمن الدوائي هو عصب أساسي للدولة المصري وفي جائحة كورونا لو مكنش عندنا منظومة صحية قوية في الدولة، مكناش هنتخطي الجائحة دي بأقل الخسائر وتوفير الدواء أول حاجة ساعدت الدولة في تخطي الجائحة.
نقابة الصيادلة، قالت أن البنك المركزي ومجلس الوزراء قدموا دعم كبير لكل الصناعات عن طريق القروض قصيرة وطويلة المدى بهامش ربح بسيط، وهيئة الدواء مش بستفاد من القروض دي، وتطوير منظومة الدواء هيؤدي لتصدير الدواء، وهيساعد لي دخول عملة صعبة للدولة المصرية .
الدكتور مصطفى مدبولي، رئيس وزراء مصر قال إن احتياجاتنا من الدواء والمستلزمات الطبية بالعملة الصعبة بتوصل لـ 250 مليون دولار شهريًا وممكن تزيد في بعض الشهور، وانه تم الاتفاق مع مصنعي الدواء على زيادة الأدوية المزمنة بشكل معقول وتعويض جزء من الخسارة من خلال أدوية تانية زي المكملات الغذائية علشان يكون عندنا توازن في سوق الأدوية .