مفاجأة المركزي اللي جاية.. أخطر تقرير عن مستقبل الدهب.. وأحدث صفقة استثمارية في مصر.. ولغز الاستثمارات الصامتة

متابعينا الكرام في كل مكان أهلا وسهلا بكم وتحليل جديد لاهم التقارير اللي قدمتها وحدة أبحاث بانكير على مدار اليوم  النهاردة الأحد 25 أغسطس 2024..

البداية مع تقرير مهم عن اللى هيحصل فى البنك   المركزي بعد مفاجأة الفيدرالي الأمريكي..

وشرح التقرير إنه يوم الجمعة اللى فاتت ولأول مرة من أكتر من سنتنين جيروم باول رئيس بنك الاحتياطي الأمريكي أعلن بكل وضوح وصراحة ان الفيدرالي هيوقف سياسته التشددية فى مواجهة التضخم وهيبدأ في خفض اسعار الفايدة خلال الفترة الجاية في تلميح واضح لخفض الفايدة الأمريكية في سبتمبر الجاي .

وكشف بانكير إن خفض سعر الفائدة الامريكية هيكون ليه تداعيات ايجابية كبيرة على الأسواق فى كل دول العالم بعد سنين صعبة كانت فيها الاسواق تحت رحمة رفع الفايدة 
وسلط التقرير الضوء على سيناريوهات لجنة السياسة النقدية التابعة للبنك المركزي في اجتماعها الجاي.. وقال التقرير إنه خلال 10 ايام من دلوقتي هتعقد لجنة السياسة النقدية خامس اجتماع ليها فى 2024 للنظرفى أسعار الفايدة على الايداع والاقراض وسط توقعات بان اللجنة ممكن تفاجيء الأسواق والأوساط المالية بتخفيض سعر الفايدة بقيم تتراوح بين 1 و2 %  وتوقعات تانية بتقول ان السيناريو الأقرب تثبيت الفايدة..
  
التقرير التالي الل قدمته منصات بانكير كان بخصوص مصير أسعار الدهب في الايام الجاية.. وشرح بانكير إن الدهب في خلال الشهرين اللي فاتوا طالع ومكمل في الصعود وإن مصر زيها زي باقي الدول اللي متأثرة بالاحداث اللي بتحصل في كل دول العالم وخصوصا في منطقة الشرق الأوسط والصراعات الكتيرة اللي بتهدد استقرار المنطقة بشكل كامل، وطبعا الصراعات  دي أثرت بشكل كامل علي الأسعار والاستثمار في العالم كله.
ولفت بانكير إن أسعار الدهب مستمرة في الصعود لنهايات سنة 2025  ودا بسبب الأحداث الجارية في المنطقة بجانب اتجاه بنك الاحتياطي الفدرالي الأمريكي لفخض سعر الفايدة وارتفاع شهية البنوك المركزية لشراء وحيازة المعدن الاصفر كملاذ آمن.

منصات بانكير قدمت النهاردة تقرير خاص عن الاستثمارات الصامتة في مصر..

وسلط التقرير الضوء على استثمار الصناديق الخاصة بما فيها صناديق التأمينات..
وكشف بانكير في البداية إن عدد صناديق التأمين الخاصة المسجلة حوالي 764 صندوقًا في نهاية سنة 2021، بلغ العامل منها 694 صندوق بالإضافة إلى 70 صندوقًا تحت التصفية، وبيستفيد منها حوالي 5 مليون عضو، بإجمالي اشتراكات سنوية بلغت قيمتها 13.6 مليار جنيه في نهاية عام 2021..

ولفت التقرير إن فيه قفزة حصلت في استثمارات صناديق التأمين الخاصة بنهاية 2021 واللي زادت 102.3 مليار جنيه بمعدل نمو بلغت نسبته 19.5% مقارنة بالعام السابق 2020 بحسب اخر بيانات واللي كشفت عن ارتفاع إجمالي استثمارات صناديق التأمين الخاصة في مصر إلى 36.7 مليار جنيه خلال الفترة من يناير وحتى نهاية شهر يونيو اللي فات مقارنة بنحو 11.5 مليار جنيه خلال الفترة المماثلة من العام الماضي.

التقرير الأخير اللي قدمته وحدة ابحاث بانكير النهاردة كان بخصوص أخر تطورات ملف الاستثمارات

وكشف التقرير عن توسع مجموعة كرافت هاينز العالمية في استثماراتها في السوق المصري.. ولفت بانكير إن
وفد من  مجموعة كرافت هاينز العالمية اجتمع النهاردة مع المهندس حسن الخطيب وزير الاستثمار والتجارة الخارجية تم استعراض  استثمارات الشركة الحالية والمستقبلية بالسوق المصري وخطط المجموعة لمضاعفة معدلات الإنتاج وزيادة الصادرات خلال المرحلة المقبلة.

وقال الوزير إنه تم  استعراض جهود المجموعة الرامية إلى تحويل مصنعها في مصر وهو مصنع المجموعة الوحيد بمنطقة الشرق الأوسط وأفريقيا إلى مركز إقليمي للتصنيع والتصدير، بجانب  الاعتماد على العناصر البشرية المصرية الماهرة لتغطية المنطقة بأكملها، وهو مشروع هام يحظى باهتمام القيادة العليا للمجموعة.

وحسب التقرير اللقاء استعرض كمان جهود المجموعة على مدار ال 3 سنين اللي فاتوا واللي تضمنت تنفيذ أعمال توسعية بالمصنع، ودا بغرض مضاعفة القدرات الإنتاجية وزيادة التصدير بنسبة 65%، من خلال استثمارات أجنبية مباشرة قدرها 50 مليون دولار حيث من المقرر افتتاح التوسعات الحالية الشهر المقبل.