قرارات ثورية.. الحكومة والمالية ناوية على إيه في الشهر الجاي
هتسمعوا اخبار حلوة وهيكون فيه قرارات مالية ثورية.. دا اللي أكد عليه رئيس الحكومة الدكتور مصطفى مدبولي في اخر مؤتمر صحفي ليه من ساعات.. ايه هي بقي القرارات دي وليه مدبولي ما العنش عنها في وقتها وايه قصة زيادة المرتبات وخفض الأسعار الفترة الجاية.. كل ده هنعرفه مع حضراتكم في الفيديو ده خليكم معانا للآخر
الدكتور مصطفى مدبولي، رئيس مجلس الوزراء، عمل مؤتمر صحفي يوم الخميس اللي فات واتكلم في حاجات كتير تخص المواطن المصري زي الإسكان والكهرباء ورأس الحكمة والاسعار والسلع والدعم المالي الجديد من الحكومة للمواطن لكن مقالش حاجة واضحة بخصوص الدعم ده لكن قال إنه هيكون فيه قرارات ثورية في سبتمبر هتسعد المواطن المصري .
طبعا مفيش حاجه بتسعد المصريين في الأيام دي غير زيادة المرتبات والمعاشات وبقة المخصصات المالية لاصحاب تكافل وكرامة وكل واحد بيقبض دعم من الحكومة ولأن رئيس الحكومة عارف كده فقال إن موضوع المرتبات والمعاشات والدعم المالي مطروح بقوة في الأيام الجاية..
طيب مدبولي قال ايه بالظبط؟
شوف ياسيدي الدكتور مصطفى مدبولي قال نصا كده إن وزارة المالية والاستثمار هيعلنوا خلال النص الأول من شهر سبتمبر اللي جاي بعد كام يوم عن إجراءات ثورية في مجال الإصلاح الضريبي، وتشجيع الاستثمار، وتيسير الإجراءات فيما يخص الاستثمار والتجارة الخارجية، واللي هتلبي طلبات القطاع الخاص والاستثماري وتخلق انطلاقة قوية للقطاع الخاص في مصر.. وكشف مدبولي إن الحكومة على مدار سنة 2024 أصدرت أكتر من 32 رخصة ذهبية ودا لتشجيع المشروعات الهامة، وإن مساهمة القطاع الخاص في عام 2024 زادت لنسبة 37%، بعد ماكانت 26% في السنة اللي قبلها وإن الدولة ماشية بخطى سريعة ليتجاوز نسبة القطاع الخاص 65% من إجمالي الاستثمارات.
ومين بين كلام رئيس الحكومة قال الدكتور مصطفى مدبولي، رئيس مجلس الوزراء، إن موضوع زيادة المرتبات والمعاشات مطروح باستمرار على أجندة الحكومة كإجراء للتخفيق عن المواطنين لكن دا بيكون محكوم بحاجات تانية كتير وأكد مدبولي على إمكانية زيادة الأجور والمرتبات خلال الفترة الجاية، في ظل زيادة الأسعار وفجر مدبولي مفاجأة من العيار التقيل بما قال إن الحكومة تصيغ حاليا حزمة حوافز ورعاية اجتماعية جديدة وأنها مش شرط تكون في صورة زيادة المرتبات لكن ممكن تكون حوافز مختلفة في صورة أسعار مخفضة مثلا لكن رجع واكد إن الحكومة بتدرس ملف المرتبات في إطار المحددات الخاصة بالموازنة.
وقال مدبولي كمان إن الحكومة معاها خطة لزيادة المرتبات وهيام أعلانها في خلال الكام شهر اللي جايين والأهم إن مصر بتسير بخطى ثابتة، مع سعى الحكومة لتخفيف الأعباء بشتى السبل، وليس في صورة مرتبات فقط...
لغاية هنا وخلص كلام الدكتور مصطفى مدبولي رئيس الوزراء ونقدر تقول بشكل عام ان فيه تحسن كبير في المشهد الاقتصادي وموضوع زيادة مشاركة القطاع الخاص في المشروعات والتنمية دي حاجة مهمة جدا على المستوى البعيد لأنها بتخلق اقتصاد قوي وحقيقي قائم على المنافسة والجودة والتوسعة وخلق فرص العمل والابتكار والاستعانة باحدث التكنولوجيا العالمية لأن مشروعات القطاع الخاص في كل المجالات قائمة على تقديم الأحدث والافضل ودي نقطة فارقة في مسار الاقتصاد المصري.. تاني حاجة قصة الدعم المادي دي حسب كلام مدبولي مطروحة بقوة قدام الحكومة وزي ما قلنا وممكن تكون في اكتر من اتجاه يعني مثلاً الحكومة ممكن تخفض الأسعار والخدمات من غير ماتزود المرتبات أو العكس صحيح او ممكن تعمل الحاجتين مع بعض ودا حسب الحالة المالية للدولة وقتها.
