لغز إشاعة حدود السحب.. شوف المفاجأة

هي ليه الاشاعات رجعت تزيد من تاني في مصر اليومين دول بالذات.. وايه علاقتها بالوضع الاقتصادي والمالي وليه رجعت في الوقت دا بالذات.. الحقيقة التفاصيل صادمة.. خليكم معانا وهنعرف التفاصيل كلها في الفيديو ده

فاكرين من كام يوم لما الدولار سعره ارتفع فجأة بشكل كبير وعلى مدار يومين وطلعت وقتها اشاعات وأخبار وتحليلات على المنصات إياها والسوشيال ميديا التابعة لاهل الشر وملت البلد أن الدولار رجع يختفي تاني وإن السوق السوداء راجعة وسعره هيدخل على ال60 جنيه وكلام كتير جدا تاني لغاية ما الدولار رجع ينزل تاني وقتها قلنا لحضراتكم هنا في بانكير بردو إن الفترة الجاية هتسمعوا اخبار كتير زي دي حولين الدولار وإن فيه أزمة كبيرة في البنوك وإن السوق السودا لازم هترجع وقلنا إن الاشاعات هتزيد في الفترة الجاية وفعلا دا حصل وبيحصل.. طيب ايه السبب وايه اخر إشاعة ؟

شوف ياسيدي في اخر كام ساعة المنصات إياها روجت لخبر ملهوش اي مصدر ولا بيان رسمي وقالت إن البنوك المصرية رجعت موضوع حدود السحب الدولاري ومن غير ماتقول مين اللي قال كده ولا ازاي لكن هي نشرت الكدبة وسابتها تكبر وتزيد وتنتشر على مواقع التواصل الاجتماعي والسوشيال ميديا والغريبة إن مفيش اي مصدر رسمي ومعروف خاصة ان أي حاجة بتحصل في القطاع المصرفي مش بتتسخبي وبيطلع بيها بيان.. المهم المصرفي الكبير محمد الإتربي رئيس اتحاد البنوك المصرية طلع بنفسه ونفي ما تم نشره عبر مواقع التواصل الاجتماعي بخصوص وضع حدود من قبل البنك المركزي للسحب الدولاري في البنوك .

رئيس اتحاد البنوك المصرية، قال كمان إن قرار حدود السحب الدولاري متروك للبنك نفسه وإن الجنيه المصري، ليه حدود متفق عليها من قبل، وان حدود للسحب الدولاري في بنك مصر هيتم عرضها على مجلس الإدارة، وهيتم الإعلان عنها خلال الأسبوع الجاي وأكد الاتربي وقال إن  القطاع المصرفي المصري قوي وشديد بعد إعادة الهيكلة بسبب حسن إدارة البنك المركزي، وارتفاع أرباح القطاع المصرفي وزيادة التدفقات الدولارية وضرب مثل على كده إنه من ساعة  تحرير سعر الصرف في مارس 2024، ارتفعت معدلات تحويلات المصريين بالخارج إلى المعدلات الطبيعية، بنسبة 200% عن الوقت السابق، مع تحويل المبالغ إلى شهادات ادخارية في البنوك.

طبعا عودة الاشاعات زي ما اتعودنا بتعرفنا إن مصر ماشية صح وبتنجح كمان ودي الفايدة الوحيدة من الاشاعات المنتشره لانه بيعرفنا إن أهل الشر وأعداء البلد مش عاجبهم النجاح اللي بيحصل وبيحاولوا يشوهوه باي شكل واسهل طريقه يعملوا دا أنهم ينشروا الكدب والاشاعات ويخوفوا الناس من تاني..
طيب ايه اللي نجحت فيه البلد وخلي منصات الشر تنتفض من تاني؟
لو حضرتك متابع الأرقام وحركة الاستثمار والصناعة والانتعاش الغير مسبوقة في كل قطاعات الاقتصاد المصري هتعرف ليه الناس دي مضايقة اووي كده ورجعت تنشر الاشاعات ودا لأن مصر داخلة على مرحلة تانية خالص بعد ماقدرت تهزم كل التحديات وتعبر الأزمات من غير ما تقرب حتى من مرحلة السقوط ودي فايدة انك تكون دولة كبيرة وفيها قيادة من نوع خاص بتحس بالخطر وتتعامل معاه وتهزمه واللي حصل في مصر من 2022 لغاية أول 2024 بيقول إن البلد دي مش ممكن أبدا توقع لأنها عندها حلول لكل حاجة.