هتبدأ بكرة.. مواعيد صرف مرتبات الموظفين والزيادة الجديدة

مرتبات الشهر، واحدة من اهم الحاجات اللي بتشغل بال كل الناس وخصوصا الموظفين العاملين في الحكومة والجهاز الإداري في الدولة والمواطنين اللي علي المعاش.. ياتري امتي الدولة هتصرف مرتبات الناس لشهر أغسطس.. وهل في زيادات جديدة هتحصل في المرتب.

في الوقت د من كل شهر، كل الناس بيكون عندها سؤال واحد بس، وهو امتي المرتب هينزل، وهل هيتاخر ولا هيجي في معاده.. وقبل ما ما الكلام يكثر عن مواعيد صرف المرتبات.. وزارة المالية أعلنت عن تفاصيل صرف مرتبات شهر اغسطس وسبتمبر للعاملين في الحكومة والجهاز الإداري للدولة .

الحكومة اعلنت عن تقديم مواعيد صرف مرتبات شهري أغسطس الجاري وسبتمبر اللي جاي، وهتبدا تبكير صرف مرتبات شهر أغسطس الحالى للعاملين بالدولة من بكرة الخميس.
الوزارة أعلنت كمان عن صرف مرتبات سبتمبر اللي جاي هيكون بداية من يوم 22 من الشهر نفسه، والمتأخرات هتكون في أيام 8 و9 و10 من نفس الشهر، وقالت أن فلوس ومرتبات كل العاملين في الجهاز الأداري في الدولة هتكون موجودة في المواعيد اللي قولنا لحضراتكم عليها من شوية وفقا للمواعيد المعلنة بالمنظومة المالية الحكومية في ماكينات الصراف الألي ويقدروا يصرفها في اي وقت.

وزارة المالية طلبت من العاملين في الجهات الإدارية عدم التزاحم على ماكينات الصراف الآلي، خصوصا أن المرتبات هتكون متاحة في أي وقت بدءا من تاريخ بدء الصرف المحدد لكل الجهات الإدارية.
طيب مرتبات العاملين في الدولة بتوصل لكام شهريا؟.
وزارة المالية حددت قيمة مرتبات شهر أغسطس الحالي وقالت أن موظف الدرجة الممتازة بيوصل الراتب بتاعه لـ 12.200 جنيه، وموظف الدرجة العالية بيوصل الراتب بتاعه لـ 10.200 جنيه، وموظف درجة المدير العام بيوصل راتبه لـ 9.200 جنيه، وموظف الدرجة الأولى بيوصل راتبه لـ 8200 جنيه، وموظف الدرجة الثانية الراتب بتاعه بيوصل لـ 8000 جنيه، وموظف الدرجة الثالثة راتبه بيوصل لـ 7500 جنيه، و موظف الدرجة الرابعة راتبه بيوصل لـ 7000 جنيه، وموظف الدرجة الخامسة راتبه بيوصل لـ 6500 جنيه، وموظف الدرجة السادسة راتبه بيوصل 6000 جنيه واللي هو الحد الأدني للأجور.
طيب صرف المرتبات هيكون ازاي هل هيكون متاح للجميع ولا هيكون لجهات محددة في أيام معينة ؟
وزارة المالية اعلنت عن  جدول صرف مرتبات شهر أغسطس، وحددت بكرة الخميس لبدء صرف مرتبات شهر أغسطس للعاملين في عدد من الجهات زي مجلس النواب والجهاز المركزي للمحاسبات ووزارة التموين والتجارة الداخلية ووزارة القوى العاملة ووزارة التضامن الاجتماعي ومديريات الطرق والنقل.

وزارة المالية حددت يوم الجمعة 23 أغسطس لصرف مرتبات العاملين في وزارات التعليم العالي والتنمية المحلية والعدل والكهرباء والتخطيط والاستثمار والتعاون الدولي والتربية والتعليم والزراعة والشباب والرياضة والمالية، وباقي من الهيئات الحكومية زي الأزهر ودار الإفتاء المصرية.