قناة سويس جديدة؟.. اعرف أضخم مشروع قومي بتعمله الحكومة دلوقتي

يا ترى إيه هو المشروع اللي بتنفذه الحكومة دلوقتي وبيتقال عليه قناة سويس جديدة، هل هيكون متعلق بالملاحة ولا بترول وتعدين ولا كهربا، وليه الفريق كامل الوزير قال عليه إنه أضخم مشروع في العشر سنين الأخيرة.. هنقولك كل التفاصيل في التقرير التالي.
 

دلوقتي وزارة النقل بتنفذ أضخم مشروع في تاريخها، واللي هو شبكة القطارات السريعة اللي هتبقى عبارة عن ممرات تنمية جديدة بأطوال ألفين كيلو مترو، وهتخدم كل محافظات الجمهورية.

وبالفعل، دلوقتي بيتم تنفيذ الخطين الأول والثانى في وقت واحد، لأن وزارة النقل حريصة على استكمال المشروع ده بالذات لأنه هيغير حياة المصريين كلية.

ولو ماتعرفش، شبكة القطارات السريعة هتكون عبارة عن 4 خطوط هتربط كافة المدن المصرية ببعضها، وكمان هتربط خطوط الإنتاج والتصدير ببعضها، وهتخلق مجتمعات عمراني جديدة.

وحاليا، بيتم تنفيذ خطين بشبكة القطارات السريعة، وشغالة فيهم الشركات المصرية فى وقت واحد، والخط الأول قرب يخلص، وهو (العين السخنة / العلمين/ مطروح) وهيتم تشغيله تجريبيا فى الربع الأول من سنة 2026.

أما الخط التاني من شبكة القطار السريع، فوزارة النقل شغالة عليها بردو بالتزامن مع إنشاء الخط الاول، وفعلا المراحل دي بتشهد معادلات إنجاز متقدمة كل يوم.

والخط ده هيمر ب ( أكتوبر/أسوان/ابوسمبل)، وطوله 1100 كيلو متر، ومفترض ينتهي بنهاية ستة 2027، وعدد محطات الخط الثانى 36 محطة، هي (الفيوم / بنى سويف – المنيا – اسيوط – سوهاج - قنا- الأقصر - ادفو -مطار أسوان – توشكى – أبوسمبل )، و ( العياط – الفشن – العدوة - بنى مزار – سمالوط– أبو قرقاص – ملوى – ديروط – القوصية – منفلوط – أبوتيج – الغنايم – طهطا – جهينة – ابيدوس - فرشوط – نجع حمادى – دشنا- قوص -ارمنت-اسنا - السباعية – كلابشة – دراو – أسوان الجديدة -ميدكوم)، وهيلتقي في محطة حدائق أكتوبر بالخط الأول، وفي محطة قنا بالخط الثالث.

كمان، الخط الثاني هيمر بالتوازى مع مسار الطريق الصحراوى الغربى المار بمحافظات الصعيد.

ضيف على ده، إن شبكة القطارات الكهربائية السريعة، هتخدم كل أنحاء جمهورية مصر العربية، وهتكون شرايين تنمية للمناطق العمرانية والصناعية الجديدة والقائمة، زي ( حلوان و15 مايو وبرج العرب والسادس من أكتوبر والمنيا الجديدة وأسيوط الجديدة وغيرها من المناطق الصناعية ).

ومش بس كده، دي هتخدم كمان المناطق السياحية ( الثقافية والتاريخية والدينية والشاطئية ) في مصر،  هتقدم خدمة المناطق السياحية في الجيزة وسوهاج والأقصر وأسوان وأبو سمبل والبحر الأحمر ) وغيرها من الأماكن، وكمان هتخدم المناطق الزراعية الجديدة سواء في الدلتا الجديدة أو مستقبل مصر أو جنة مصر وغرب المنيا وتوشكى وشرق العوينات.

أما عن عدد القطارات اللي هتشتغل على الشبكة دي، فهتكون 60 قطر و20 جرارا لنقل البضائع بشكل أولى، لضمان تحقيق أكبر عائد مالي يغطى مصروفات التشغيل والصيانة، وكمان الشبكة دي هتوفر الآلاف من فرص عمل مباشرة وغير مباشرة للشباب.
كل ده بيقول إن مصر بتعمل قناة سويس تالتة بس على قضبان السكك الحديد واللي مش هتقل أهمية عن قناة السويس القديمة والجديدة في نقل البضائع والتخديم على شبكة المواني بأنحاء الجمهورية وهتقلل الوقت وتساعد في سرعة نقل البضائع وجذب وإغراء المستثمرين واللي هيرحبوا بالاستثمار في بلد عنده اقوى شبكة سكك حديد في الشرق الأوسط غير بقية المواني واللوجستيات والطرق الحديثة.