بالفيديو..إزاي تشتري سيارة من الجمارك بأفضل سعر؟

يا ترى لو حضرتك بتفكر تشتري عربية هتجيبها كاش ولا تقسيط، ولا هتفكر في طرق تانية مش معروفة لناس كتير، واللي منها سيارة الجمارك، طب يا ترى إزاي اشتري عربية مضمونة وبأفضل سعر من الجمارك.. هنقولك كل التفاصيل في الفيديو ده. 
 

في الساعات الأخيرة، مصلحة الجمارك المصرية، عملت مزاد علني في نادي الجيزة الرياضي، وده كان لبيع 29 لوط سيارات وقطاع غيارها المخزنة في ساحة جمارك السيارات بمطار القاهرة الدولي.

كمان المصلحة حددت شوية شروط كده للتقديم على  مزادات السيارات سواء للأفراد أو التجار، واللي منها ضرورة شراء كراسة الشروط للمزاد بقيمة 400 جنيه بمقر الهيئة العامة للخدمات الحكومية بالدقي.

ولازم قبل موعد المزاد بوقت كافي، يتم  معاينة السيارات بساحات جمارك السيارات بمطار القاهرة الدولي بالقرب من موقف الأتوبيسات بمطار القاهرة، وده بيكون من الساعة 9 صباحا وحتى 2 ظهرا خلال أيام العمل الرسمية وحتى يوم عقد المزاد .

وبيبقي مطلوب كمان حضرتك تسدد مبلغ تأمين دخول المزاد بقيمة 10 آلاف جنيه بخزينة جمرك سيارات بمطار القاهرة كتأمين مؤقت بخزينة الجمارك أو أثناء المزاد ولا يرد التامين المؤقت إلا بعد انتهاء الجلسة، عشان مايضعش عليك المزاد.

وضمن شروط المزاد كمان، تقديم بطاقة الرقم القومى للأفراد العاديين على أن تكون سارية، بالإضافة لاقديم البطاقة الضريبية  بالنسبة للتجار كشرط لدخول المزاد.

ومن هنا نقدر تقولك، أنك بعد ما تستوفي كل الشروط دي، هيبقي ليك حق الاشتراك في المزاد خلال عملية المعاينة، وهيتم اصطحاب أشخاص آخرين لديهم خبرة في معاينة السيارات .

طب نظام بيع السيارات في المزاد ده بتكون إزاي عشان ماخسرش فلوسي؟

أولا، بيتم البيع وفقا لأحكام القانون رقم 182 لسنة 2018 بشأن تنظيم التعاقدات التى تبرمها الجهات العامة ولائحته التنفيذية الصادرة بالقرار 692 لسنة 2019 .

وكمان البيع بردو بيتم طبقا للترتيب الوارد بكراسة الشروط وشراء كراسة المزاد شرط لدخول المزاد ويباع كل لوط على حدة وبدون عمولة.

طب إزاي المزاد يرسى عليا؟ 
بص يا سيدي، لازم اللي كل يرسى عليه المزاد يكون مسدد مبلغ 30 % مـن ثمـن الصفقة، وفـي حالة عدم السداد في نفس اليوم يكون التأمين المؤقت من حق الجهة الإدارية

كمان بيتم سداد مقدم الثمن نقدًا بخزينة الهيئة نقدا أو بإحدى الوسائل الإلكترونية طبقا للمادة ٢١ من قانون ١٨٢ لسنه ٢٠١٨ ولائحته التنفذية.

أما تحصيل نسبة الـ 70 باقى مبلغ المزاد، فيتم خلال 15 يوم من اليوم التالى لرسول المزاد، ودي بتبقى من خلال البنوك المعتمدة، زي بنك ( الأهلي / مصر / القاهره ) وبما يتجاوز مبلغ 5 آلاف جنيه لا غير.

وعشان ماتتخمش ولا تضيع فلوسك، هنقولك شوية نصايح تانية قبل ما تشتري العربية، وهي:

لازم تختار المكان المناسب للشراء، يعني لازم تكون عارف المكان اللي هتشتري منه كويس جدا ويكون ثقة وله اسم.

كمان لازم تجمع أكبر قدر من المعلومات عن العربية اللي عايز تشتريها، سواء من خلال الإنترنت أو من خلال سؤال أهل الثقة والاختصاص، وكمان عشان ماتقعش فريس لجشع التجار.

لازم بردو حضرتك تاخد معاك أحد المختصين في السيارات أثناء الشراء، لأنه بيكون عنده علم ودراية بأجزاء السيارة والأعطال بتبقى فين، وكمان معاه أسعار السوق.

ماتنساش تدرس السوق وأسعاره كويس قبل ما تشتري، وكمان مطلوب منك تتحقق من عقد العربية المسجل في الشهر العقاري وده للحفاظ على حقك وكذلك حق الطرف الآخر.