مشروع بـ600 مليون دولار.. إيه اللي بيحصل في الصحراء الغربية

ياترى ايه اللي بيحصل في مصر وإيه حكاية المشروع الضخم اللي هيقلب الموازين في قطاع الغاز المصري وإزاي مصر هترجع مركز اقلميي للطاقة في المنطقة من تاني.. شوف الفيديو دا وهتعرف التفاصيل كلها.

مصر فضلت قبل حقل ظهر بتعاني من استهلاك متزايد في استهلاك الغاز الطبيعي وخاصة مع توسع الصناعات المعتمدة على الغاز في تشغيل المصانع واللي بستهلك كميات ضخمة لكن مع اكشاف حقل ظهر في 2015 بواسطة عملاق النفط الايطالي شركة إيني وبالتوازي مع اكتشافات تانية زي حقول النرجس وغيرها مصر تحولت من الاستهلاك الى التصدير بعد الاكتفاء ذاتيا وفي سنة من السنين مصر صدرت غاز ب8 مليار دولار قبل ما تحصل الانتكاسة الاخيرة في حقل ظهر ويقل انتاجه لظروف طبيعية وفي نفس الوقت تزامن ده مع أشد موجة حر شافتها مصر في تاريخها ودا ضاعف استهلاك الغاز الطبييعي بشكل غير مسبوق خاصة في محطات انتاج وتوليد الكهربا بسبب الضغط الكبير على الشبكة الكهربائية على مستوى الجمهورية ودا خلى البلد في حالة ماسة للغاز واضطرت تشتري شحنات ضخمة وعلى وجه السرعة من الاسواق العالمية عشان تنهي أزمة تخفيف الاحمال.
وفي عز أزمة انقطاع الكهربا وبعد التشكيل الوزاري الجديد بدأت وزارة البترول والثروة المعدنية خطة طموحة جدا لإعادة مصر للخريطة العالمية في ملف الطاقة وبدأن بسداد مستحقات شركات البترول العالمية في مصر واللي بدأت تضخ مليارات الدولارات للتنقيب عن الغاز والبترول وفي نفس الوقت تطور الحقول الموجودة وشركة ايني نزلت تاني بتقلها وقررت حفر 2 حقل ظهر جداد في نفس منطقة الامتياز في البحر المتوسط وغير أكتر من 145 موقع للتنقيب بدأت تهل بشايره.
خبراء الطاقة توقعوا اكتشافات ضخمة من الغاز في الطريق وعشان كده الحكومة استعدت بدري للتعامل مع كميات الغاز المتوقعة لاستغلالها أفضل استغلال.. الجديد بقي إن وزارة البترول والثروة المعدنية المصرية، بتعمل دلوقتي مشروع محطة معالجة الغاز الطبيعي في الصحراء الغربية، وتشغيلها تجريبيا لاستيعاب الزيادة المستهدفة بإنتاج الغاز المصري، منتصف 2025.

وكشف مصدر حكومي إن المشروع تكلفته هتوصل  إلى 600 مليون دولار، وإن محطة المعالجة "مليحة" التابعة لشركة عجيبة للبترول هتُعزز من تدفيع كميات الغاز الطبيعي إلى الشبكة القومية بالبلاد.

وزير البترول والثروة المعدنية المصري كريم بدوي، سبق وتعهد في منتصف يوليو اللي فات قدام اللجنة البرلمانية المختصة ببرنامج الحكومة، بإن الوزارة بتسعى إلى التوسع في إنتاج الغاز والنفط من خلال توقيع 145 اتفاقية التزام سارية مع 40 شريكًا للتنقيب والبحث عن البترول والغاز في الأراضي المصرية.
بحسب المعلومات شركة بتروجت المصرية بتتولى تنفيذ أعمال المشروع الضخم في الصحراء الغربية باعتبارها المقاول العام للمحطة، وبتتعاون معاها شركة "شلمبرجير- SLB" في بعض الأعمال الهندسية والتصميم والتوريدات لمحطة المعالجة.

طيب إيه هدف المحطة الجديدة بالظبط؟
شوف ياسيدي المحطة الضخمة دي هتوفر معالجة الغاز الطبيعي في الصحراء الغربية لاستقبال الغاز المستخرج من حقول الامتياز بالمنطقة وبتوفر ملايين الدولارات في تكاليف نقل الغاز لمحطات المعالجة اللي في شمال مصر ومحطة معالجة الغاز الجديدة كمان هتربط عدد من الآبار ومناطق الامتياز الغازية قبل ضخها في الشبكة القومية بالبلاد.
وزارة البترول كمان خططت لحفر 110 بير استكشافية بإجمالي استثمارات 1.2 مليار دولار خلال 2024 - 2025، و586 بير استكشافية بإجمالي استثمارات 7.2 مليار دولار حتى 2030.. يعني باختصار كده مصر مش هتسكت غير لما ترجع تاني مركز لإنتاج الغاز في المنطقة.