إزاي الحكومة هتخفض الدين العام وهل ده هينعكس على انخفاض الأسعار؟
يا ترى إزاي الحكومة هتخفض الدين العام للدولة زي ما قالت، هل هتلجأ لتطبيق سياسات اقتصادية جديدة ولا هتنفذ برنامج بره الصندوق عشان تجذب رؤوس الأموال لمصر ومنها تقدر توفي بالتزاماتها، وفي نفس الوقت تنخفض الأسعار.. هنقولك كل التفاصيل في الفيديو ده.
مؤخرا، وزير المالية أحمد كجوك، أكد أن الحكومة بتبذل جهد كبير عشان تخفض معدل الدين العام، واللي هو الفلوس اللي مصر اقترضتها من الخارج، وأكد كمان أن وزارة المالية عندها برنامج متكامل عشان خفض المديونية الحكومية على المدى المتوسط.
وكشف وزير المالية، عن الإجراءات اللي شغالين عليها عشان تخفض تكلفة الدين، واللي أهمها تنويع قاعدة المستثمرين والعملات والأسواق، بمعنى جذب مستثمرين من كل الجنسيات وتسهيل إجراءات الاستثمار عليهم، بالإضافة لجذب عملات مختلفة من الاستثمارات دي، زي الدولار واليورو والروبل وغيرها.
وكمان، "كجوك" اتكلم عن سعيهم لإطالة عمر الدين، يعني بدل ما ندفع القروض على 10 سنين تبقى على 20 سنة أو 30، وكل ده طبعا هدفه تعزيز درجة الـثقة في الاقتصاد المصري.
طب إيه هي آليات لجذب الاستثمار اللي هتعملها الحكومة؟
هي عبارة عن حلول أو طرق الآليات مبسطة لتسوية المنازعات والحياد الضريبي تقدر تساعد فى جذب المزيد من الاستثمارات الخاصة بالأنشطة الاقتصادية، وضيف على ده عنصر التحول الرقمي الشامل في الإدارة الضريبية، واللي معناه توسيع القاعدة الضريبية وضم ممولين جدد.
وفي نفس الوقت، قال وزير المالية، إن معدل الدين الداخلى لأجهزة الموازنة انخفض بنسبة ٤,٧٪ من الناتج المحلى رغم صعوبة الظروف الاقتصادية، وأكد إنهم بيستهدفوا الحفاظ على تحقيق فوائض أولية سنوية للنزول بمعدل الدين للناتج المحلى إلى أقل من ٨٥٪ مع نهاية العام المالى المقبل 2024.
وذكر كمان أن رصيد المديونية الخارجية لأجهزة الموازنة انخفض بأكثر من ٣,٥ مليار دولار مع نهاية يونيه ٢٠٢٤ بنسبة خفض تزيد على ٤٪ مقارنة بشهر يونيه ٢٠٢٣، وإن متوسط عمر الدين الخارجي لأجهزة الموازنة بلغ ١٢,٧ عام مع نهاية يونية ٢٠٢٤.
ونقدر نقول إن في أسباب كتير ساهمت في تحسين الأوضاع وتخفيض عجز الميزانية العام المالي الماضي، اللي سجل جاء أدنى من 4%، واللي منها صفقة رأس الحكمة، وكمان إيرادات بعض الهيئات الاقتصادية زي هيئة السكة الحديد وغيرها.
كل ده بيعتبر كلام ورسائل إيجابية لرجال الأعمال والمستثمرين المحللين أو الأجانب، وبكده نقدر نجذب رؤوس الأموال للعمل في مصر.. وبالتأكيد كل ده هيشغل الاقتصاد ويخلي مصر في حتة تانية خالص، وكمان هيعود على المواطن بالخير.
