تحركات غير طبيعية في البنوك.. قرارات على وشك الصدور

ايه الل بيحصل في البنوك المصرية دلوقتي وليه في حالة ترقب شديدة وإيه اللي بيحصل في الغرف المغلقة وليه رؤساء مجالس الادارة بيراجعوا أوراقهم ودفاترهم.. خلونا نشوف اللي بيحصل في التقرير التالي.

معروف إن قطاع البنوك في مصر هو عماد الاقتصاد المصري وأساس خطط التنمية وهي شريك اساسي في النهوض الاقتصادي وليها دور حيوي في تمويل المشروعات وتقديم الخدمات البنكية وهي الذراع المالي للدولة المصرية والحقيقة هي ذراع قوي جدا ومعروف إن قطاع البنوك في مصر من القطاعات العريقة في العالم والمنطقة ومصر من أوائل الدول في الاقليم اللي عرفت النظام المصرفي واللي قدر على مدار سنين طويلة إنه يتطور ويساير أحدث الأنظمة البنكية في العالم كله.
طيب ايه مناسبة الكلام عن البنوك المصرية النهاردة.؟
شوف حضرتك إحنا دلوقتي في شهر أغسطس وفي الشهر دا غالبا بتصدر قرارات بنقل وتعيين وانتداب قيادات القطاع المصرفي المصري وبتكون أهم حدث في الوسط المالي في يومها لأن البنوك زي أي قطاع اقتصادي في البلد بيحتاج تغيير دماء وضخ فكر جديد والاستفادة من حماس اجيال مصرفية تانية وفي نفس الوقت بتعتبر القيادات الكبيرة أو اللي هتسيب المنصب بتاعها كنوز لا تقدر بتمن لأن عندها كم خبرة كبير جدا وعشان كده الدولة مش بتتخلي عنهم وبتستفيد بيهم كمستشارين من ناحية تانية لان تراكم الخبرات في القطاع المصرفي هو من أهم أسباب قوة البنوك والمنظومة المالية في مصر.
ولو فاكرين الرئيس عبد الفتاح السيسي قررت تعيين المصرفي الكبير حسن عبد الله محافظا للبنك المركزي في نفس شهر 
أغسطس من سنتين وتحديدا في 18 أغسطس 2022 وكل الترجيحات بتقول إن هيصدر قرار رئاسي بتجديد تعيين عبد الله في منصبه بسبب الاداء الاحترافي اللي أدار بيه البنك المركزي المصري أزمات الدولار وسوق الصرف ومواجهة السوق السودا وعمليات التلاعب في السوق وقدرته على اتخاذ قرارات مرنة وسريعة والسيطرة على اسواق الصرف في مصر وخارج مصر ضمن منظومة البنوك المصرية وقدر كمان إنه يخترع مبادرات جديدة تجيب دولار من تحت الأرض وكل اللي تتخيله البنك المركزي المصري عمله عشان ماتحصلش فوضى مالية في اقليم مشتعل وفيه أزمات كتير جدا.
وحسب المعلومات المتاحة حركة التغيرات والتنقلات في قيادات البنوك الحكومية هتشمل أسماء كتيرة وهتيجي أسماء تانية بتعتبر مفاجأة في القطاع المصرفي وخاصة العناصر الشابة والجيل التاني من القيادات وده لخلق روح من الحماس والتطوير المستمر في القطاع وحسب المعلومات بردو من المقرر صدور قرارات الحركة الجديدة في أي وقت ممكن ساعات وممكن خلال أيام .
خبراء الاقتصاد شايفين إن أي تغيرات ايجابية في قطاع البنوك بيكون ليه تأثيرات واضحة في تجديد شباب القطاع ودا بينعكس على أداء البنوك طبعا وتطورها وتوسعها وتحديث خدماتها المصرفية لأن القيادات الجديدة عاوزة تثبت نفسها بانجازات تتحسب ليها.