بتبدأ من ألف جنيه.. هدايا "دهب وعربيات" سعرها مناسب لطلاب الثانوية العامة.. شوف الفيديو

يا ترى لو عندك ابن أو أخ أو حد عزيز عليك نجح في الثانوية العامة السنة دي، هتكافئه إزاي، هل في هدايا دهب سعرها مناسب ممكن تقدمها، ولو  أنت ميسور شوية هل ممكن تفكر في العربيات، طب والأسعار  عاملة إيه دلوقتي.. هنقولك كل التفاصيل في الفيديو ده. 
 

في الساعات الأخيرة، ظهرت نتيجة الثانوية العامة 2024 في مصر، وأغلب البيوت المصرية رنت فيها الزغاريد احتفالا بنجاح الأبناء والأحباب، لكن يا ترى بعد الزغاريد والشربات، هتكافئوا الناجح بايه؟

بص يا سيدي، في هدايا دهب سعرها مناسب، تقدر تقدمها لابنك، زي سبائك الدهب اللي بتبدأ من ربع جرام، وسعرها بيسجل 1000 جنيه بس، والسبيكة دي بتعتبر هدية مُناسبة بتتقدم في كل المناسبات، فما بالك ثانوية عامة بقى.

كمان، في سبيكة دهب وزن نص جرام وسعرها 2000 جنيه، وفي سبيكة تانية جرام سعرها 4000 جنيه.

ولو الناجح بنت، ممكن تشتري لها أنسيال نص جرام عيار 18، بأقل من ألفين جنيه، وبكده تبقى قدمت هدية قيمة ومناسبة وكمان فرحت حبايبك الناجحين.

وبالمناسبة دي، هنعرض لحضرتك سعر الدهب انهاردة في الصاغة، واللي سجل فيه الجرام عيار 21 نحو  3360 جنيه للشراء و3340 جنيه للبيع، وسجل عيار 24، نحو 3840 جنيها للشراء و3817 جنيه للبيع، والأسعار يوميا في ارتفاع، فلو بتفكر تشتري هدية دهب انزل وماتترددش.

ومن الدهب للعربيات، واللي ممكن هي كمان تكون هدية للمتريشين شوية أو الأسر الغنية، اللي حابه تكافىء ابنها وتجبله عربية عشان يروح بيها الجامعة.

اليومين دول، بيحصل رواج كبير في سوق السيارات في مصر وده طبعا بسبب نتيجة الثانوية العامة، وبالنسبة للأسر اللي عايزة تجيب لابنها عربية سواء جديدة أو مستعملة، فسعر الجديد بيبدأ من 500 ألف جنيه كمتوسط، وبيوصل لمليون جنيه.

أما سعر السيارة المستعملة اللى حالتها كويسة، فبتبدأ من 300 ألف جنيه زي نيسان صني موديلات الألفينات أو هيونداي اكسنت مستعملة موديل أوائل الـ 2000.

كمان في عربيات زيرو محلية الصنع،  تصلح كهدايا للناجحين في الثانوية العامة، زي ماركة BYD أوتوماتيك اللي بيبدأ سعرها من 650 ألف جنيه، أما السيارة المانيوال من نفس الماركة فبتبدأ من 500 ألف جنيه.

يعني باختصار، أي حد معاه ميزانية يشتري لابنه من مستعمل لزيرو، فسوق  السيارات في مصر والمعروض هيستوعب كل الميزانيات.