بعد تراجع خسائر مصر للطيران.. شوف الأسباب الحقيقة لأزمة الشركة الوطنية

وزير الطيران المدني الدكتور سامح الحفني أعلن عن تراجع خسائر شركة مصر للطيران الي 16 مليار جنية.. ياتري كام خسائر شركة مصر للطيران وليه اصلا الشركة بتخسر 
 
مصر للطيران واحدة من الشركات الوطنية والمهمة للدولة المصرية وهيا الذراع الطويل للشركة للوصول لكل جهات ودول العالم ومختلف القارات، لكن الفترة الأخيرة الأمور داخل قطاع الطيران المدني بشكل عام مش هيا ولا ماشية زي ما الحكومة عايزة .
وفي مفاجأة من العيار الثقيل الدكتور سامح الحفني وزير الطيران المدني أعلن عن تراجع خسائر شركة مصر للطيران من 30 مليار إلي 16 مليار يعني الشركة عوضت ما يقرب من 14 مليار جنية من خسائرها، وقال الوزارة حاليا شغالة علي اكثر من اتجاه لتعظيم الموارد المالية والتجارية في المطارات .
طيب ليه اصلا شركة مصر للطيران بتخسر خصوصا انها شغالة طوال السنة ومش مرتبطة بموسم ؟.
مصر للطيران زي ما هيا واحدة من أهم واعرق الشركات، إلا أنها عندها بعض المشاكل الكبيرة واحدة من أهم المشاكل دي هيا أن عدد العاملين الموجودين في الشركة اعلي بكثير من عدد الطائرات اللي المفروض يكونوا عند الشركة، خصوصا أن الشركة أسطولها الجوي بيقرب من 57 طيارة وعددهم العاملين الموجودين عندها أكثر من 50 الف موظف، ومفيش شركة طيران في العالم عندها الطاقة العددية دي كلها، ولو حسبنا الطاقة العمالية الموجودة عن الشركة علي عدد الطائرات هيكون كل طائرة عندها أكثر من 300 موظف بيقوموا بخدمتها.
وعلشان نفهم اية هيا مشكلة مصر للطيران لازم نعرف أن مكاسب مصر للطيران هيا مكاسب علي الورق، يعني أن الشركة مش بتمسك فلوس في أيدها والمكاسب دي ما هيا الا فلوس شركة من الشركات التابعة للشركة القابضة لمصر للطيران بتكون محققة مكاسب في نفس الوقت في شركة تانية من الشركات عندها خسائر وبالتالي الفلوس اللي الشركة بتكسبها هنا بتعمل لها تحويل علشان تعوض خسائر في حتة تانية خصوصا أن الشركة القابضة لمصر للطيران عندها أكثر من شركة تانية تابعة لها زي شركة مصر للطيران للخطوط الجوية وشركة مصر للطيران للاسواق الحرة وشركة مصر للطيران للصيانة والأعمال الفنية وشركة مصر للطيران الخدمات الأرضية وشركة مصر للطيران للخدمات الجوية وشركة مصر للطيران الخدمات الطبية وشركة مصر للطيران للصناعات المكملة وشركة مصر للطيران للشحن الجوي، وفي الشهور اللي فاتت شركة مصر للطيران بدأت تنفيذ دمج شركة مصر للطيران للخطوط الداخلية والإقليمية "إكسبريس" في شركة مصر للطيران للخطوط الجوية، وبعدها تم بدمج شركة مصر للطيران المكملة في شركة مصر للطيران للخدمات الأرضية وده كنوع من خطط الشركة لتقليل الخسائر خصوصا أن كل شركة مو دول لها رئيس مجلس إدارة وموظفين وأعضاء مجلس إدارة وغيرها من الوظائف اللي موجودة في كل الشركات .
واحد كمان من أهم أسباب خسائر شركة مصر للطيران أن عندها خطوط ملهاش اي جدوي اقتصادية يعني الرحلة مش بتحقق ثمنها وتشغيلها بيكون بخسارة ولكن الدولة عايزة كده علشان الرحلات اللي من النوع ده بيكون لها أهداف سياسية أكثر من أهدافه الاقتصادية زي الرحلات اللي موجودة بين مصر وبعض الدول الأفريقية واللي اكيد بتحقق خسائر كبيرة علي شركة مصر للطيران وفي حالة لو الشركة قررت وقف النوع ده من الخطوط بيكون كنوع من أنواع قطع العلاقات السياسية بين مصر والدولة اللي وقف معاها خط الطيران .
واحد كمان من أهم الكوارث اللي حققت خسائر شركة مصر للطيران هيا أزمة كورونا واللي وقفت كل خطوط الطيران حول العالم ومصر للطيران كانت واحدة من الشركات اللي اتاثرت طبعا بالأزمة دي،. وكمان الشركة قامت بدورها في تنفيذ خطة الدولة لعودة المصريين العاملين في كل دول العالم ونلقتهم وقت الأزمة العالمية وإغلاق الحدود بين الدول .