ضربة المركزي الكبرى.. اجهاض المؤامرة على الجنيه ووقف نزيف الأموال الساخنة
يا ترى ايه اللى بيحصل فى سوق صرف العملات الأجنبية فى الساعات الأخيرة ؟ وليه الدولاررجع يقفز قفزات كبيرة من جديد؟ وازاى البنك المركزي بيتحرك لاجهاض المؤامرة على الجنية ووقف نزيف الأموال الساخنة؟
فيه بوادر أزمة كبيرة بتحصل فى سوق صرف العملات الأجنبية والدولار فى التعاملات الأخيرة قفز بصورة كبيرة ووصل حاليا الى مستوى قريب من 50 جنيه وفيه توقعات بمزيد من الارتفاع خلال الفترة الجاية
طب هل ده حلو ولا وحش ؟
عشان نجاوب على السؤال ده لازم نفهم ليه حصل تحريك فى سعر العملة الأمريكية .. بص يا سيدى فى اخر فترة حصل تخارج كبير للاموال الساخنة من سوق أدوات الدين الحكومية .. وعشان كده البنك المركزي كان لازم يتحرك عشان يوقف نزيف الأموال الساخنة وحاليا الدولار بقى بـ 49.5 ودا خبر كويس .. وللي مش فاهم ليه ده خبر كويس... خلينى اشرحلك .. التعويم لما حصل فيه عشرات المليارات من الدولارات دخلت مصر ودي كلها اموال ساخنة ... في منهم اللي دخلوا أول يومين يعني واشتروا الدولار على سعر 50 و 51 جنيه وفيه اللي دخلوا عن طريق شهادات CIB بأرقام فوق ال 50 جنيه كمان بشوية.
ودول دخلوا باعوا لنا الدولار ب 50 جنيه.. واخدوا جنية مصري سلفوه للحكومة في أذون خزينة 3 و 6 و 12 شهر بفائدة أول يوم تعويم كانت 32% وثاني جلسة كانت 30% يعني بعد الضرايب 20%.. وعشان كده لما حد كان بيقولي الدولار هيبقى 45 جنيه كتير من الخبراء كانوا بيشوفوا ان ده كارثة .. تخيل حد باعلك مليار دولار ب 50 مليار جنية وهياخد 20% بس فايدة يعني هيبقى معاه 60 مليار جنية... تنزلوا سعر الدولار ل 45 فيروح شاري 1.33 مليار دولار يعني تديهم فايدة عالدولار 33% .. ده كلام يخليك تخسر كتير جدا
وخد عندك مثلا فى شهر 6 اللى فات لما الدولار كان سعره حوالى 47 جنيه ونص خرج من مصر 4 مليار دولار والمستثمرين الأجانب أخدوا فايدة سندات 3 شهور ورجعوا اشتروا الدولار بسعر أرخص 2 جنية عن وقت ما دخلوا السوق يعنى مكسب 9% على الدولار فى 3 شهور.. هو فيه احسن من كده .. وخد بالك صندوق النقد عشان يضمن فلوسه نصح الحكومة وقالهم سعر صرف مرن يعني لما يحصل طلب عالدولار وناس طالعه من السوق ؛ الطلب بيؤدي إلى زيادة السعر فترفعوا سعر الدولار
ومع اللى بيحصل من توترات فى المنطقة واشتعال الصراع بين ايران واسرائيل المستثمر يقولك انا اطلع دلوقتى ولما الامور تستقر ابقا ارجع تانى وعشان البنك المركزي يوقف الخساير ويمنع نزيف الموال الساخنة لازم يحرك سعر الدولار ويخلى سعره قريب للسعر اللى اشترى بيه الأجانب عند حدود 50جنيه لأن وقتها المستثمر هيلاقي نفسه مش محقق مكاسب وهيضطر يقعد لحد السعر ينزل شوية وهيفكر الف مرة قبل ما ياخد قرار سحب امواله
وكفاية تعرف ان يوم الخميس اللى فات فيه 297 مليون دولار خرجوا من مصر .. والجمعة والسبت كانوا إجازة.. ومع اول يوم عمل الحد فيه كمان 226 مليون دولار خرجوا... ودول أجانب باعوا الأذون والسندات بتاعتهم وأخدوا جنية وهيروحوا يشتروا دولار ويطلعوا... فإمبارح صافي بيع الأجانب 11 مليار و 17 مليون جنية.
إمبارح كان سعر الدولار 48.8 يعني دول يعملوا 226 مليون دولار بس خد بالك هما إمبارح باعوا الأذون المصرية مش اشتروا دولار... لسه بقى هياخدوا فلوسهم ويشتروا هوبا بقى النهاردة الدولار 49.5 ففلوسهم دي بقت 222 مليون دولار ولو الدولار قفل 50 يبقى فلوسهم 220 مليون دولار. هو دا اللي الصندوق بيقوله في طلب عالدولار زود سعره عشان تقلل اللي خارج منك.
طيب هل ارتفاع سعر الدولار دا كويس يعني؟
لغاية مستوي معين آه كويس ؛ والصعود مش مقلق طول ما هو لسه في نطاق معين لكن لو كسرنا النطاق دا هيحصل حالة هلع من الأجانب وخروج جماعي فالصعود دا مفروض محطوط له سقف بحيث نمسك العصاية من النص نقلل اللي خارجين مننا وفي نفس الوقت منخوفش اللي لسه قاعدين ويقولوا اننا بنقع تاني فيهربوا
